نیوزڈیسک
اسلام آباد: وزیراعظم آفس نے وزیراعظم شہباز شریف اور فیلڈ مارشل عاصم منیر کی امریکی صدر ڈونلڈ ٹرمپ سے اوول آفس میں ہونے والی ملاقات کا اعلامیہ جاری کردیا ہے۔
اعلامیے کے مطابق ملاقات خوشگوار اور گرمجوش ماحول میں ہوئی، جس دوران شہباز شریف نے صدر ٹرمپ کو “امن کا علمبردار” قرار دیا۔
شہباز شریف کا کہنا ہے کہ صدر ٹرمپ دنیا بھر میں تنازعات کے خاتمے کے لیے مخلصانہ کوششیں کر رہے ہیں۔
وزیراعظم نے صدر ٹرمپ کی جرات مندانہ، دلیرانہ اور فیصلہ کُن قیادت کو سراہتے ہوئے کہا کہ ان کی کوششوں سے پاکستان اور بھارت کے درمیان جنگ بندی ممکن ہوئی، جس نے جنوبی ایشیا کو ایک بڑے سانحے سے بچایا۔
اعلامیے میں مزید کہا گیا کہ شہباز شریف نے غزہ میں جنگ کے فوری خاتمے کے لیے ڈونلڈ ٹرمپ کی کاوشوں اور نیویارک میں مسلم دنیا کے رہنماؤں کو مدعو کرنے کے اقدام کو بھی سراہا۔
یاد رہے کہ اوول آفس میں ہونے والی یہ ملاقات ایک گھنٹہ بیس منٹ تک جاری رہی۔ ملاقات کے بعد وزیراعظم واشنگٹن سے نیویارک روانہ ہوگئے، جہاں وہ آج اقوام متحدہ کی جنرل اسمبلی سے خطاب کریں گے۔
