اسلام آباد: عالمی منڈی میں تیل کی بڑھتی ہوئی قیمتوں کے باعث پاکستان میں پیٹرولیم مصنوعات کی قیمتوں میں اضافے کا امکان ہے۔
ذرائع کے مطابق، پیٹرول کی قیمت میں 5.13 روپے فی لیٹر اضافہ متوقع ہے، جس کے بعد نئی قیمت 263.30 روپے فی لیٹر ہو سکتی ہے۔ جبکہ ہائی سپیڈ ڈیزل کی قیمت میں 6.8 روپے فی لیٹر اضافہ متوقع ہے، جس کے بعد یہ 282.50 روپے فی لیٹر تک پہنچ جائے گی۔
آئل اینڈ گیس ریگولیٹری اتھارٹی (اوگرا) پیٹرولیم مصنوعات کی حتمی ورکنگ پیٹرولیم ڈویژن کو ارسال کرے گی، اور قیمتوں میں تبدیلی کا آخری فیصلہ وزیراعظم کی منظوری کے بعد کیا جائے گا۔
پیٹرولیم ڈویژن کی منظوری کے بعد نئی قیمتیں یکم مارچ سے نافذ العمل ہوں گی اور یہ اگلے 15 دنوں تک برقرار رہیں گی۔
ماہرین کے مطابق، عالمی مارکیٹ میں عرب لائٹ کروڈ آئل کی قیمت میں 2.7 فیصد اضافہ اور سپریڈز میں معمولی اضافہ قیمتوں میں اضافے کی بنیادی وجہ ہیں۔
گزشتہ پندرہ دنوں میں وفاقی حکومت نے پیٹرول کی قیمت 258.17 روپے فی لیٹر اور ڈیزل کی قیمت 275.7 روپے فی لیٹر مقرر کی تھی۔
