پشاور کے علاقے یکہ توت میں پولیس مقابلے کے دوران چار مبینہ ڈاکو ہلاک ہوگئے، جبکہ ان کے دو ساتھی فرار ہونے میں کامیاب ہوگئے۔ پولیس کے مطابق ہلاک ہونے والے ملزمان کا تعلق ایک منظم ڈکیت گینگ سے تھا جو خیبر پختونخوا، پنجاب، سند اور اسلام آباد پولیس کو مختلف سنگین مقدمات میں مطلوب تھا۔سی سی پی او پشاور کے مطابق ہلاک ہونے والوں میں گینگ کا سرغنہ وقار عرف میجر، ساحل عرف سعود، اعجاز پہلوان اور حفیظ چرے شامل ہیں۔ فرار ہونے والے ملزمان کی گرفتاری کے لیے پولیس نے سرچ آپریشن شروع کردیا ہے۔پولیس حکام کے مطابق وقار عرف میجر گینگ گزشتہ تقریباً 15 سال سے منظم جرائم میں سرگرم تھا۔ گینگ میں افغانستان کے رہائشی گران ولی اور علی عرف شینا سمیت دیگر ملزمان بھی شامل تھے۔ پولیس کے مطابق گینگ کے ارکان مختلف سنگین مقدمات میں ایک درجن سے زائد مرتبہ گرفتار ہوچکے تھے، تاہم عدالتوں سے ضمانت پر رہا ہوتے رہے۔سی سی پی او کا کہنا ہے کہ یہ گینگ پشاور سے کراچی تک پھیلے ہوئے ایک منظم نیٹ ورک کے طور پر کام کرتا تھا۔ ملزمان سیکیورٹی فورسز سے مشابہہ لباس، وائرلیس سیٹ، جدید اسلحہ اور وائی فائی جیمرز سمیت جدید مواصلاتی آلات استعمال کرتے تھے۔پولیس کے مطابق ملزمان خفیہ اداروں کے اہلکار بن کر گھروں میں داخل ہوتے اور تلاشی کے بہانے نقدی، سونا اور دیگر قیمتی سامان لوٹ لیتے تھے۔حکام کے مطابق گینگ حیات آباد میں 80 لاکھ روپے، ڈی ایچ اے کراچی میں تقریباً 8 کروڑ روپے اور راجا بازار راولپنڈی میں تقریباً 10 کروڑ روپے کی ڈکیتیوں سمیت لاہور اور دیگر علاقوں میں متعدد وارداتوں میں ملوث تھا۔ پولیس کے مطابق ملزمان پر درگئی ملاکنڈ، جھنگ، فیصل آباد اور سندھ میں بھی ڈکیتیوں کے مقدمات تھے۔
