وفاقی دارالحکومت( نیوز ڈیسک)اسلام آباد میں ضلعی انتظامیہ نے امن و امان برقرار رکھنے کے لیے ہر قسم کے عوامی اجتماعات پر پابندی عائد کرتے ہوئے دفعہ 144 نافذ کر دی ہے۔
سرکاری اہلکار کے مطابق دفعہ 144 کے تحت کسی بھی ریلی، مظاہرہ یا عوامی اجتماع کی اجازت نہیں ہوگی اور خلاف ورزی کرنے والوں کے خلاف سخت قانونی کارروائی عمل میں لائی جائے گی۔ شہریوں کو ہدایت کی گئی ہے کہ وہ ہجوم یا کسی عوامی اجتماع میں شرکت سے گریز کریں۔ انتظامیہ نے رہائشیوں سے تعاون کا بھی مطالبہ کیا ہے تاکہ دارالحکومت میں امن و استحکام برقرار رکھا جا سکے۔
سحری اور تراویح کے دوران سیکیورٹی کا جائزہ
ڈپٹی انسپکٹر جنرل اسلام آباد پولیس محمد جواد طارق نے ایس ایس پی آپریشنز قاضی علی رضا کے ہمراہ شہر بھر میں سحری اور تراویح کے دوران سیکیورٹی انتظامات کا تفصیلی جائزہ لیا۔
انہوں نے مساجد، امام بارگاہوں اور حساس مقامات کا دورہ کیا اور تعینات افسران کو مذہبی اوقات کے دوران سخت چوکسی برقرار رکھنے کی ہدایت کی۔ ڈی آئی جی محمد جواد طارق نے رمضان کے مقدس مہینے میں شہریوں کے جان و مال کے تحفظ کے لیے مکمل عزم کا اعادہ کیا۔
آئی سی ٹی پولیس کا کریک ڈاؤن، 31 ملزمان گرفتار
اسلام آباد کیپیٹل ٹیریٹری (آئی سی ٹی) پولیس نے مختلف علاقوں میں کارروائی کرتے ہوئے 31 ملزمان کو گرفتار کیا اور منشیات، شراب اور غیر قانونی اسلحہ برآمد کر لیا۔
کارروائیوں میں کراچی کمپنی، شالیمار، گولڑہ، سنگجانی، انڈسٹریل ایریا، ہمک، نیلور، بہارہ کہو اور شہزاد ٹاؤن تھانوں کی ٹیمیں شامل تھیں۔ برآمد شدہ سامان میں 110 گرام چرس، 145 گرام ہیروئن، 421 گرام آئس، 210 بوتلیں شراب اور 10 پستول بمعہ ایمونیشن شامل ہے۔
ایس ایس پی آپریشنز قاضی علی رضا نے کہا کہ وفاقی دارالحکومت میں امن و امان برقرار رکھنے کے لیے کریک ڈاؤن جاری رہے گا اور پولیس فورس شہریوں کے تحفظ اور عوامی امن کے قیام کے لیے ہر ممکن اقدامات کرے گی۔
