بیجنگ (ویب ڈیسک): چین کی وزارت خارجہ نے تصدیق کی ہے کہ ایران پر اسرائیلی اور امریکی حملوں کے نتیجے میں ایک چینی شہری ہلاک ہو گیا ہے، جبکہ 3 ہزار سے زائد چینی شہریوں کو ایران سے محفوظ طور پر نکال لیا گیا ہے۔
چینی وزارت خارجہ کے جاری کردہ بیان میں کہا گیا ہے کہ متاثرہ شہری کی ہلاکت کی تصدیق ہو چکی ہے اور باقی شہریوں کے انخلا کا عمل مکمل کر لیا گیا ہے۔ وزارت خارجہ نے ایران میں موجود اپنے شہریوں کو فوری طور پر ملک چھوڑنے کی ہدایت بھی جاری کی ہے۔
وزارت خارجہ نے اسرائیلی اور امریکی حملوں کو بین الاقوامی قانون کی خلاف ورزی قرار دیتے ہوئے کہا کہ ان کارروائیوں کے ہمسایہ ممالک پر سنگین اثرات مرتب ہو سکتے ہیں، جس پر چین کو گہری تشویش ہے۔
پیر کے روز باقاعدہ پریس بریفنگ کے دوران ترجمان ماؤ ننگ نے فوجی کارروائیاں فوری طور پر روکنے اور سفارتی مذاکرات کی طرف واپسی کا مطالبہ کیا۔ انہوں نے کہا کہ چین عالمی تعلقات میں طاقت کے استعمال کی ہمیشہ مخالفت کرتا آیا ہے اور مسائل کے حل کے لیے مذاکرات اور سفارت کاری کو ہی مؤثر راستہ سمجھتا ہے۔
ماہرین کے مطابق چین کا یہ بیان ایسے وقت میں سامنے آیا ہے جب مشرقِ وسطیٰ میں کشیدگی بڑھ رہی ہے اور مختلف عالمی طاقتیں صورتحال پر گہری نظر رکھے ہوئے ہیں۔ چین نے ایک بار پھر زور دیا ہے کہ خطے میں استحکام کے لیے تمام فریقین تحمل کا مظاہرہ کریں اور فوری جنگ بندی کی طرف پیش رفت کریں۔
