اسلام آباد پاکستان نے اگلی نسل کی موبائل سروسز کے آغاز کی جانب اہم قدم اٹھاتے ہوئے 5G اسپیکٹرم کی بڑی نیلامی مکمل کر لی ہے، جس کے بعد ملک میں 5G سروسز کے آغاز کی راہ ہموار ہو گئی ہے۔پاکستان ٹیلی کمیونیکیشن اتھارٹی (PTA) کی جانب سے منعقدہ نیلامی میں ٹیلی کام آپریٹرز نے مختلف فریکوئنسی بینڈز میں اسپیکٹرم حاصل کیا۔ نیلامی سے مجموعی طور پر 507 ملین ڈالر حاصل ہوئے جبکہ 480 میگا ہرٹز اسپیکٹرم فروخت کیا گیا۔ملک کی تین بڑی ٹیلی کام کمپنیوں جاز، زونگ اور یوفون نے نیلامی میں حصہ لیتے ہوئے اسپیکٹرم حاصل کیا۔ نتائج کے مطابق جاز سب سے بڑا خریدار بن کر سامنے آیا جس نے 700، 2300، 2600 اور 3500 میگا ہرٹز بینڈز میں 190 میگا ہرٹز اسپیکٹرم حاصل کیا۔یوفون نے 3500 اور 2600 میگا ہرٹز بینڈز میں 180 میگا ہرٹز اسپیکٹرم خریدا جبکہ زونگ نے 110 میگا ہرٹز اسپیکٹرم حاصل کیا۔ماہرین کے مطابق نئے اسپیکٹرم سے انٹرنیٹ کی رفتار، نیٹ ورک کی گنجائش اور کوریج میں نمایاں بہتری آئے گی، خاص طور پر ایسے وقت میں جب ملک بھر میں ڈیٹا کے استعمال میں مسلسل اضافہ ہو رہا ہے۔
وفاقی وزیر آئی ٹی شزا فاطمہ خواجہ نے کہا کہ نیلامی کا عمل مکمل شفافیت کے ساتھ انجام دیا گیا اور عوام کے اعتماد کے لیے بولی کے عمل کو براہ راست نشر بھی کیا گیا۔حکومت ابتدائی مرحلے میں اسلام آباد اور صوبائی دارالحکومتوں میں 5G سروسز متعارف کرانے کا ارادہ رکھتی ہے، جس کے بعد اسے مرحلہ وار دیگر شہروں تک توسیع دی جائے گی۔ حکام کے مطابق 700 میگا ہرٹز بینڈ دیہی اور کم سہولت والے علاقوں میں بہتر کنیکٹیویٹی فراہم کرنے میں اہم کردار ادا کرے گا۔
