اسلام آباد برطانوی نشریاتی ادارے بی بی سی کی 1965 میں بنائی گئی فلم “دی وار گیم” کو تقریباً 20 سال تک ٹیلی ویژن پر نشر نہیں کیا گیا۔ اسکی وجہ یہ بتائی گئی کہ فلم کے مناظر عام گھریلو ناظرین کے لیے حد سے زیادہ خوفناک اور پریشان کن ثابت ہو سکتے تھے۔فلم میں برطانیہ پر ایک فرضی جوہری حملے کے ممکنہ تباہ کن اثرات کو نہایت حقیقت پسندانہ انداز میں پیش کیا گیا ہے۔ اس دستاویزی طرز کے ڈرامے کو ہدایت کار پیٹر واٹکنز نے بنایا تھا اور اسے نیوز رپورٹ کے انداز میں فلمایا گیا تاکہ ایٹمی جنگ کے ممکنہ نتائج کو حقیقت کے قریب دکھایا جا سکے۔فلم میں دکھایا گیا ہے کہ ایٹمی حملے کے بعد شہروں میں خوف و ہراس پھیل جاتا ہے، لوگ اپنے گھروں سے فرار ہونے لگتے ہیں، خاندان بچھڑ جاتے ہیں اور بنیادی سہولیات کا نظام درہم برہم ہو جاتا ہے۔ تابکاری کے خطرناک اثرات اور ہنگامی خدمات کے ٹوٹنے کا منظر بھی اس میں شامل ہے۔بی بی سی نے اس کی شدت اور حقیقت پسندی کے باعث اسے ٹیلی ویژن پر نشر نہ کرنے کا فیصلہ کیا، تاہم محدود سامعین کے لیے اس کی اسکریننگ کی اجازت دی گئی۔پابندی کے باوجود اس فلم کو عالمی سطح پر بڑی پذیرائی ملی اور اسے بہترین دستاویزی فیچر کا اکیڈمی ایوارڈ (آسکر) بھی دیا گیا، جبکہ بافٹا کے دو ایوارڈز بھی اس کے حصے میں آئے۔
آج یہ فلم تاریخ کی ایک اہم دستاویز سمجھی جاتی ہے جو یہ سوال اٹھاتی ہے کہ میڈیا جنگ اور تباہی کی حقیقتوں کو کس حد تک عوام کے سامنے پیش کر سکتا ہے۔
