نیوز ڈیسک
اسلام آباد: ڈائریکٹر جنرل انٹر سروسز پبلک ریلیشنز (ڈی جی آئی ایس پی آر) لیفٹیننٹ جنرل احمد شریف چوہدری نے کہا ہے کہ پاکستان سعودی عرب کی سلامتی اور دفاع کے لیے اپنے غیر مشروط عزم پر قائم ہے اور مملکت کی حفاظت کے لیے ہر ضروری اقدام کرنے کو تیار ہے۔
عرب نیوز کو دیے گئے انٹرویو میں ڈی جی آئی ایس پی آر نے کہا کہ پاکستان سعودی عرب کے ساتھ سفارتی اور عملی، دونوں محاذوں پر کھڑا ہے اور سعودی سلامتی کے حوالے سے اس کے عزم میں کوئی شرط نہیں۔
انہوں نے کہا کہ پاکستان مکہ مکرمہ اور مدینہ منورہ جیسے مقدس شہروں کے تحفظ کے لیے پرعزم ہے، جبکہ ملک کی سیاسی اور عسکری قیادت سعودی قیادت سے مسلسل رابطے میں ہے۔
لیفٹیننٹ جنرل احمد شریف چوہدری کے مطابق پاکستان موجودہ بحران کے پرامن اور مذاکرات کے ذریعے حل کے لیے علاقائی ممالک اور دیگر شراکت داروں کے ساتھ بھی سفارتی رابطے جاری رکھے ہوئے ہے۔
انہوں نے مزید کہا کہ پاکستان مکہ مکرمہ کے تحفظ سے متعلق دفاعی معاہدے کے تحت اپنی ذمہ داریاں پوری کرے گا اور سعودی عرب کی ضروریات اور درخواستوں کے مطابق ہر ممکن تعاون فراہم کرے گا
