سعودی عرب میں پاکستانیوں کے لیے نادرا کی خصوصی سہولت، الظہران میں موبائل رجسٹریشن کیمپ 24 اور 25 جولائی کو لگے گا

اسلام آباد (23 جولائی 2026): نیشنل ڈیٹابیس رجسٹریشن اتھارٹی (نادرا) نے سعودی عرب میں مقیم پاکستانی شہریوں کے لیے خصوصی سہولت کا اعلان کرتے ہوئے موبائل رجسٹریشن ٹیم کے دورہ شیڈول کا اجرا کر دیا ہے۔نادرا کے مطابق موبائل رجسٹریشن ٹیم پاکستان ایمبیسی کے تعاون سے سعودی عرب کے شہر الظہران کے تمیمی نیو کیمپ، ایسٹرن پراونس میں 24 اور 25 جولائی 2026 (جمعہ اور ہفتہ) کو کیمپ قائم کرے گی۔کیمپ میں مقامی وقت کے مطابق صبح 8 بجے سے شام 4 بجے تک پاکستانی شہری شناختی کارڈ اور دیگر نادرا دستاویزات کے اجرا، تجدید اور تبدیلی سمیت مختلف خدمات سے استفادہ کر سکیں گے۔ نادرا کا کہنا ہے کہ اس اقدام کا مقصد بیرونِ ملک مقیم پاکستانیوں کو ان کے رہائشی علاقوں کے قریب شناختی دستاویزات کی سہولت فراہم کرنا ہے۔