اسلام آباد: صدر پاکستان گڈز ٹرانسپورٹ الائنس ملک شہزاد اعوان نے پٹرولیم مصنوعات کی قیمتوں کے روزانہ تعین کے فیصلے کو مسترد کرتے ہوئے خبردار کیا ہے کہ اگر حکومت نے اپنی پالیسیوں پر نظرثانی نہ کی تو ملک گیر ہڑتال کی کال دی جا سکتی ہے۔
ملک شہزاد اعوان نے کہا کہ حکومت کی پالیسیوں اور ڈیزل کی قیمت میں مسلسل اضافے سے گڈز ٹرانسپورٹ کا شعبہ شدید مشکلات کا شکار ہو گیا ہے۔ ان کے مطابق اگر یہی صورتحال برقرار رہی تو ٹرانسپورٹ کا نظام متاثر ہوگا، جس کے اثرات ملکی معیشت پر بھی مرتب ہوں گے۔
انہوں نے ملک بھر کے ٹرانسپورٹرز کو ہر ممکن صورتحال کے لیے تیار رہنے کی ہدایت کرتے ہوئے کہا کہ کسی بھی وقت ملک گیر ہڑتال کا اعلان کیا جا سکتا ہے۔
صدر پاکستان گڈز ٹرانسپورٹ الائنس کا کہنا تھا کہ وفاقی اور صوبائی حکومتیں ٹرانسپورٹرز کو کوئی ریلیف فراہم نہیں کر رہیں، جبکہ ٹول ٹیکس اور ودہولڈنگ ٹیکس میں اضافے نے بھی مشکلات بڑھا دی ہیں۔ انہوں نے مطالبہ کیا کہ ڈیزل کی قیمت میں کمی کی جائے اور ٹول ٹیکس سمیت دیگر اضافی ٹیکس واپس لیے جائیں۔
واضح رہے کہ آئل اینڈ گیس ریگولیٹری اتھارٹی (اوگرا) نے پٹرول اور ڈیزل کی قیمتوں کے روزانہ تعین کا نیا نظام گزشتہ روز سے نافذ کر دیا ہے۔
