ایران کا آپریشن ’وعدہ صادق‘، امریکی تنصیبات اور اسرائیلی اہداف پر حملوں کی 54ویں لہر کا اعلان
تہران (ویب ڈیسک): ایران کی پاسدارانِ انقلاب اسلامی انقلابی گارڈ کور (IRGC) نے آپریشن آپریشن وعدہ صادق کے تحت مشرقِ وسطیٰ میں امریکی تنصیبات اور اسرائیلی اہداف کو نشانہ بنانے کے لیے حملوں کی 54ویں لہر ’یازہرہ‘ شروع کرنے کا اعلان کیا ہے۔
ایرانی حکام کے مطابق امریکی اور اسرائیلی کارروائیوں کے جواب میں یہ حملے کیے جا رہے ہیں۔ پاسداران انقلاب کا کہنا ہے کہ اس لہر میں پہلی بار سجیل میزائل استعمال کیے گئے ہیں اور خطے میں دشمن کے متعدد اہداف کو میزائلوں اور ڈرونز سے نشانہ بنایا گیا۔
ایرانی عہدیداران کے مطابق حملوں کے دوران خطے میں موجود چار امریکی فضائی اڈوں کو میزائل اور ڈرون حملوں کا نشانہ بنایا گیا، جن میں اہم انفراسٹرکچر، کمانڈ سینٹرز اور ایئر ٹریفک کنٹرول ٹاورز شامل تھے۔
پاسداران انقلاب کا مزید کہنا ہے کہ حملوں میں امریکی افواج کے مختلف اہداف کو نشانہ بنایا گیا جبکہ ایران نے زیادہ تر ایک دہائی پہلے تیار کیے گئے میزائل استعمال کیے ہیں، جن میں خرمشہر، خیبر شکن، قدر اور عماد میزائل شامل ہیں۔
ایرانی حکام کے مطابق جدید میزائل ابھی استعمال نہیں کیے گئے، اور اگر امریکا میں ہمت ہے تو وہ اپنے جنگی جہاز خلیج فارس میں لے آئے۔
بیان میں کہا گیا ہے کہ ان حملوں میں اسرائیلی فضائی کارروائیوں سے متعلق انتظامی و فیصلہ سازی کے مراکز، فوجی و دفاعی صنعتوں کے اہم انفراسٹرکچر اور اسرائیلی فوج کے اجتماعات کو بھی نشانہ بنایا گیا۔
عرب میڈیا رپورٹس کے مطابق 28 فروری سے جاری جھڑپوں کے دوران ایران میں 1444 جبکہ لبنان میں 826 افراد ہلاک ہوئے۔ دوسری جانب اسرائیل میں 14 افراد ہلاک ہوئے جبکہ امریکی افواج کے 11 اہلکار مارے گئے۔ مزید ہلاکتیں متحدہ عرب امارات میں 6، سعودی عرب میں 2، عراق میں 26، کویت میں 6، عمان میں 3 اور بحرین میں 2 بتائی گئی ہیں۔
