تہران (ویب ڈیسک): پاسدارانِ انقلاب نے ایران کی قومی سلامتی کے مشیر علی لاریجانی سمیت دیگر شہدا کے خون کا بدلہ لینے کا اعلان کر دیا ہے۔
ایرانی میڈیا کے مطابق پاسدارانِ انقلاب کے بیان میں کہا گیا ہے کہ علی لاریجانی کا خون ایرانی عزت اور قومی بیداری کی علامت ہے اور صہیونیوں کے مقابلے میں حوصلہ افزا ثابت ہوگا۔ بیان میں کہا گیا کہ “شہید علی لاریجانی اور دیگر شہدا کا بدلہ لینا کبھی نہیں بھولیں گے۔”
آرمی چیف کا ردعمل
ایرانی فوج کے کمانڈر اِن چیف امیر حاتمی نے بھی تمام شہدا کے خون کا بدلہ لینے کے عزم کا اظہار کیا۔ انہوں نے کہا کہ علی لاریجانی کی شہادت پر ایران کا ردعمل فیصلہ کن ہوگا اور دشمن کے لیے شدید پشیمانی کا باعث بنے گا۔
ان کا کہنا تھا کہ شہید لاریجانی کی انقلابی قیادت نے قوم کے لیے لازوال میراث چھوڑی ہے اور مجرمانہ اقدامات ایران کی خودمختاری اور دفاعی صلاحیت کو متاثر نہیں کر سکتے۔
اسرائیل پر نیا حملہ
ان بیانات کے بعد ایران کی جانب سے اسرائیل کے خلاف ایک اور بڑا حملہ کیا گیا، جس کے بعد تل ابیب اور یروشلم سمیت مختلف علاقوں میں خطرے کے سائرن بج اٹھے۔
واضح رہے کہ امریکی اور اسرائیلی مشترکہ حملے میں گزشتہ روز علی لاریجانی اپنے بیٹے سمیت شہید ہو گئے تھے، جس کی سرکاری سطح پر تصدیق کی جا چکی ہے
