مشرقِ وسطیٰ میں جاری کشیدگی اور ایران، امریکا و اسرائیل کے درمیان بڑھتی ہوئی جنگی صورتحال کے باعث خلیجی ممالک میں نمازِ عید سے متعلق بڑے فیصلے سامنے آئے ہیں۔
ایران پر حملوں اور خلیجی ممالک میں امریکی تنصیبات کو نشانہ بنائے جانے کے بعد خطے کی سیکیورٹی صورتحال نہایت حساس ہو چکی ہے، جس کے باعث اس بار عیدالفطر جنگ کے سائے میں منائی جائے گی۔
🇦🇪 متحدہ عرب امارات کا فیصلہ
متحدہ عرب امارات کے حکام نے اعلان کیا ہے کہ اس سال عیدالفطر کی نماز صرف مساجد کے اندر ادا کی جائے گی۔
حکام کے مطابق کھلے میدانوں اور عیدگاہوں میں نماز عید کی اجازت نہیں ہوگی۔ یہ فیصلہ عوام کی حفاظت اور سیکیورٹی خدشات کے پیش نظر کیا گیا ہے۔
اماراتی حکام کا کہنا ہے کہ ملک بھر کی تمام مساجد میں انتظامات مکمل کر لیے گئے ہیں اور شہریوں سے اپیل کی گئی ہے کہ متعلقہ اداروں کی جاری کردہ ہدایات پر مکمل عمل کریں۔
🇶🇦 قطر میں بھی پابندیاں
قطر کی وزارتِ اوقاف نے بھی عیدالفطر کے اجتماعات کے حوالے سے ضابطہ اخلاق جاری کر دیا ہے۔
وزارت کے مطابق اس سال نماز عید کھلے میدانوں کے بجائے صرف مساجد کے اندر ادا کی جائے گی۔ ملک بھر میں نمازِ عید کا وقت صبح 5 بج کر 53 منٹ مقرر کیا گیا ہے۔
قطری حکام نے واضح کیا ہے کہ حفاظتی اقدامات کے تحت کھلے مقامات پر عید کے اجتماعات کی اجازت نہیں ہوگی۔
