اسلام آباد (نیوز ڈیسک) – آئل ٹینکر کنٹریکٹرز ایسوسی ایشن نے وفاقی حکومت کو فیول سپلائی بند کرنے کی دھمکی دے دی ہے۔
ایسوسی ایشن کے صدر عابد اللہ آفریدی نے سیکریٹری پیٹرولیم کو خط لکھتے ہوئے وائٹ پائپ لائن کا کوٹہ بڑھانے پر شدید تحفظات کا اظہار کیا ہے۔
خط میں مؤقف اختیار کیا گیا کہ حکومت نے پہلے وائٹ پائپ لائن کا کوٹہ 45 فیصد اور آئل ٹینکرز کا 55 فیصد مقرر کیا تھا، جس پر اوگرا اور وزارتِ پیٹرولیم سے باقاعدہ معاہدہ بھی ہوا تھا۔ تاہم اب وزارت کی جانب سے وائٹ پائپ لائن کا کوٹہ 45 فیصد سے بڑھا کر 70 فیصد کر دیا گیا ہے۔
ایسوسی ایشن کے مطابق اس فیصلے سے قبل اسٹیک ہولڈرز سے مشاورت نہیں کی گئی، جو معاہدے کی خلاف ورزی ہے اور اس اقدام سے آئل ٹینکرز کا کاروبار شدید متاثر ہوگا۔
صدر ایسوسی ایشن نے مطالبہ کیا ہے کہ وائٹ پائپ لائن کے کوٹے میں کیا گیا اضافہ فوری طور پر واپس لیا جائے، معاہدے کے مطابق آئل ٹینکرز کا کوٹہ بحال کیا جائے اور آئل ٹینکرز کے کرایوں میں فوری اضافے کا اعلان کیا جائے، بصورت دیگر فیول سپلائی بند کرنے پر غور کیا جائے گا۔
