نیوز ڈیسک
اسلام آباد: محکمہ موسمیات نے آئندہ 24 گھنٹوں کے دوران پنجاب اور گلگت بلتستان کے مختلف علاقوں میں بارش کی پیش گوئی کرتے ہوئے متعدد علاقوں میں شہری اور اچانک سیلاب کے خطرے سے خبردار کیا ہے۔
محکمہ موسمیات کے مطابق اسلام آباد، خیبر پختونخوا، آزاد کشمیر اور شمال مشرقی بلوچستان کے بعض علاقوں میں بھی بارش کا امکان ہے، جبکہ ملک کے جنوبی حصوں میں موسم گرم اور مرطوب رہنے کی توقع ہے۔
محکمے نے خبردار کیا ہے کہ موسلا دھار بارش کے باعث اسلام آباد، راولپنڈی اور پشاور کے نشیبی علاقوں میں پانی جمع ہونے اور سیلابی صورتحال پیدا ہونے کا خدشہ ہے۔
اس کے علاوہ لاہور، اوکاڑہ، قصور، سرگودھا، فیصل آباد، ملتان، ساہیوال، گوجرانوالہ اور سیالکوٹ میں اربن فلڈنگ کا امکان ظاہر کیا گیا ہے۔
محکمہ موسمیات کے مطابق دیر، چترال، سوات، مالاکنڈ، ایبٹ آباد، گلگت بلتستان، آزاد کشمیر، اسلام آباد، راولپنڈی اور ڈیرہ غازی خان میں فلیش فلڈ کا خطرہ بھی موجود ہے۔
دوسری جانب خیبر پختونخوا، گلگت بلتستان، مری اور آزاد جموں و کشمیر کے پہاڑی علاقوں میں شدید بارش کے باعث لینڈ سلائیڈنگ کا خدشہ ظاہر کیا گیا ہے۔
محکمے نے مزید خبردار کیا کہ شدید بارش، ژالہ باری، تیز ہواؤں اور آسمانی بجلی کے باعث کمزور عمارتوں اور دیگر ڈھانچوں کو نقصان پہنچ سکتا ہے، جبکہ حساس علاقوں میں صورتحال مزید خراب ہونے کا خدشہ ہے۔
محکمہ موسمیات نے متعلقہ حکام اور شہریوں کو ہدایت کی ہے کہ حساس اضلاع میں چوکنا رہیں اور شدید بارش کے دوران ضروری احتیاطی تدابیر اختیار کریں۔
