پشاور (نیوز ڈیسک) – محکمہ بلدیات خیبر پختونخوا نے صوبائی حکومت کے فیول کنزرویشن پلان کے تحت ہر جمعہ کو 100 فیصد “ورک فرام ہوم” نافذ کرنے کا اعلان کر دیا ہے۔
محکمے کی جانب سے جاری اعلامیے کے مطابق یہ فیصلہ ایندھن کی بچت (فیول کنزرویشن) اور بہتر گورننس کے اقدامات کے تحت کیا گیا ہے۔ اس سلسلے میں لوکل گورنمنٹ ڈیپارٹمنٹ کی طرف سے باقاعدہ نوٹیفکیشن بھی جاری کر دیا گیا ہے۔
نوٹیفکیشن کے مطابق محکمہ بلدیات اور اس کی فیلڈ فارمیشنز سمیت تمام متعلقہ دفاتر کے ملازمین ہر جمعہ کو دفاتر آنے کے بجائے گھر سے آن لائن فرائض انجام دیں گے۔
یہ پالیسی ابتدائی طور پر دو ماہ کے لیے نافذ کی گئی ہے، تاہم صورتحال کا جائزہ لینے کے بعد اس میں توسیع بھی کی جا سکتی ہے۔ صوبائی حکومت کے مطابق اس اقدام کا مقصد ایندھن کی بچت اور انتظامی اخراجات میں کمی لانا ہے۔
نوٹیفکیشن میں تمام افسران اور عملے کو ہدایات پر سختی سے عملدرآمد یقینی بنانے کی تاکید کی گئی ہے تاکہ دفتری امور میں کسی قسم کا تعطل پیدا نہ ہو۔
