لاہور ایئرپورٹ پولیس نے بروقت کارروائی کرتے ہوئے وزیرآباد سے اغوا کی گئی 13 سالہ بچی مناہل کو بحفاظت بازیاب کرا لیا۔
تفصیلات کے مطابق بچی لاہور ایئرپورٹ کی کار پارکنگ میں روتی ہوئی حالت میں ملی، جہاں سے ایئرپورٹ چوکی پولیس نے اسے اپنی تحویل میں لے لیا۔
ایس پی کینٹ اختر نواز کے مطابق بچی کو اس کے سگے خالو نے وزیرآباد سے اغوا کیا تھا اور اسے کراچی لے گیا تھا۔ اس واقعے کا مقدمہ پہلے ہی تھانہ احمد نگر، وزیرآباد میں بچی کے والد کی مدعیت میں درج کیا جا چکا تھا۔
پولیس تحقیقات میں انکشاف ہوا کہ ملزم بچی کو کراچی سے نجی پرواز کے ذریعے لاہور لایا اور ایئرپورٹ پر لاوارث چھوڑ کر فرار ہو گیا۔
پولیس نے قانونی کارروائی مکمل کرنے کے بعد بچی کو اس کے والدین کے حوالے کر دیا، جس پر اہل خانہ نے پولیس کا شکریہ ادا کیا۔
مزید تفتیش کے لیے کیس متعلقہ پولیس (وزیرآباد) کے حوالے کر دیا گیا ہے تاکہ ملزم کو گرفتار کیا جا سکے۔
