“100 سے زائد عالمی قانون کے ماہرین نے ایران پر امریکی و اسرائیلی حملوں کو جنگی جرم قرار دے دیا”

واشنگٹن/تہران (ویب ڈیسک) – امریکہ میں مقیم 100 سے زائد عالمی قانون کے ماہرین نے ایک کھلے خط پر دستخط کیے ہیں، جس میں ایران پر امریکی اور اسرائیلی فوجی حملوں کی شدید مذمت کی گئی ہے اور اسے اقوام متحدہ کے چارٹر کی خلاف ورزی اور ممکنہ طور پر جنگی جرم قرار دیا گیا ہے۔

میڈیا رپورٹس کے مطابق اس خط میں کہا گیا ہے کہ امریکی فوج کے طرز عمل اور سینئر امریکی عہدے داروں کے بیانات عالمی انسانی حقوق اور بین الاقوامی انسانی قوانین کی سنگین خلاف ورزی کے خدشات پیدا کرتے ہیں۔

ماہرین نے واضح کیا ہے کہ 28 فروری سے شروع ہونے والے امریکی-اسرائیلی حملے اقوام متحدہ کی سلامتی کونسل کی اجازت کے بغیر اور ایران سے کسی فوری خطرے کے ثبوت کے بغیر کیے گئے۔

خط میں مزید کہا گیا کہ کسی بھی ریاست کے خلاف طاقت صرف اپنی دفاعی ضرورت یا کسی مسلح حملے کے جواب میں استعمال کی جا سکتی ہے، بشرطیکہ اس کے لیے اقوام متحدہ کی سلامتی کونسل کی اجازت حاصل ہو۔ تاہم سلامتی کونسل نے نہ تو ان حملوں کی اجازت دی اور نہ ہی ایران نے امریکہ یا اسرائیل پر کوئی حملہ کیا تھا۔

ماہرین نے عالمی برادری پر زور دیا ہے کہ اس معاملے پر فوری نوٹس لیا جائے تاکہ مزید انسانی نقصان اور عالمی قوانین کی خلاف ورزی روکی جا سکے۔