پاکستان نے شعبہ صحت میں ایک اور اہم عالمی اعزاز حاصل کر لیا ہے۔ World Health Organization (ڈبلیو ایچ او) نے Drug Regulatory Authority of Pakistan کے تحت کام کرنے والی سینٹرل ڈرگ ٹیسٹنگ لیب کراچی (سی ڈی ایل) کے معیار کو باقاعدہ طور پر تسلیم کر لیا ہے۔ذرائع کے مطابق ڈبلیو ایچ او نے ڈریپ کو ارسال کیے گئے خط میں سی ڈی ایل کراچی کی پری کوالیفیکیشن کی تصدیق کی ہے۔ خط میں کہا گیا ہے کہ لیب کے ٹیسٹنگ اسٹینڈرڈز عالمی ادارہ صحت کے اصولوں کے مطابق ہیں، جبکہ ڈریپ کی جانب سے کی گئی اصلاحات کو بھی تسلی بخش قرار دیا گیا ہے۔واضح رہے کہ ڈبلیو ایچ او کی ٹیم نے جنوری میں سی ڈی ایل کا تفصیلی معائنہ کیا تھا اور مختلف اصلاحات کی سفارش کی تھی، جن پر عمل درآمد مکمل کر لیا گیا۔ماہرین کے مطابق سی ڈی ایل کی اس کامیابی سے پاکستان کی فارماسیوٹیکل برآمدات میں اضافہ ہوگا اور عالمی مارکیٹ میں ملک کی ساکھ مزید بہتر ہوگی۔
