اسلام آباد (ویب ڈیسک): اسلام آباد ہائیکورٹ نے پی ٹی اے ٹربیونل کے فنانس ممبر کی عدم تعیناتی کے کیس میں وزیراعظم شہباز شریف کو 19 مئی کو ذاتی حیثیت میں عدالت میں پیش ہونے کا حکم دے دیا ہے۔
تفصیلات کے مطابق جسٹس محسن اختر کیانی نے سماعت کے دوران ریمارکس دیتے ہوئے کہا کہ وزیراعظم خود عدالت میں آ کر بتائیں کہ ٹربیونل کے فنانس ممبر کی تعیناتی کیوں نہیں کی گئی۔
عدالت میں اسسٹنٹ اٹارنی جنرل نے بتایا کہ ایک ریٹائرڈ جج کو ٹربیونل کا رکن مقرر کیا گیا ہے، جس پر جسٹس محسن اختر کیانی نے کہا کہ ریٹائرڈ ججز نے صورتحال مزید پیچیدہ بنا دی ہے اور انہیں مختلف ٹربیونلز میں تعیناتی کا شوق ہے۔
جسٹس محسن اختر کیانی نے مزید ریمارکس دیے کہ اگر 18 مئی تک فنانس ممبر تعینات نہ کیا گیا تو وزیراعظم کو عدالت میں پیش ہو کر وضاحت دینا ہوگی۔
عدالت نے کیس کی مزید سماعت 19 مئی تک ملتوی کر دی ہے۔
