اسلام آباد (ویب ڈیسک): ماہرین نے وقت سے پہلے پڑنے والی گرمی کے پیش نظر El Niño کی شدید شکل سپر ایل نینو کے خطرے سے خبردار کرتے ہوئے کہا ہے کہ اس کے نتیجے میں شدید گرمی، سیلاب اور خشک سالی ایک ساتھ سامنے آ سکتے ہیں۔
ماہرِ ماحولیات ڈاکٹر زینب نعیم کے مطابق رواں سال موسمی حالات گزشتہ برس کے مقابلے میں زیادہ شدت اختیار کرتے دکھائی دے رہے ہیں، جبکہ عالمی موسمیاتی رپورٹس سپر ایل نینو جیسی صورتحال کی نشاندہی کر رہی ہیں۔
انہوں نے کہا کہ اس کے نتیجے میں طویل اور شدید گرمی کی لہریں، نمی کے ساتھ خطرناک درجہ حرارت، اچانک موسلا دھار بارشیں اور کلاؤڈ برسٹ جیسے واقعات سامنے آ سکتے ہیں۔
ماہرین کے مطابق اس سال مسلسل مون سون بارشوں کے بجائے طویل خشک موسم اور اچانک شدید بارشوں کا امکان ہے، جس سے سیلاب کا خطرہ بڑھ سکتا ہے۔
ڈاکٹر زینب نعیم نے خبردار کیا کہ اپریل کے آخر سے ہی شدید گرمی شروع ہو چکی ہے، جبکہ مئی سے ستمبر تک دباؤ والے مہینے ثابت ہو سکتے ہیں۔
انہوں نے بتایا کہ رات کے درجہ حرارت میں بھی 2 سے 5 ڈگری سینٹی گریڈ اضافے کا امکان ہے، جس سے شہری علاقوں میں گرمی کے دباؤ اور بجلی کی طلب میں مزید اضافہ ہوگا۔
