کراچی: ہاکس بے پر سمندر میں نہاتے ہوئے تیز لہروں کی زد میں آنے والے 6 نوجوانوں کو غوطہ خوروں نے بروقت کارروائی کرتے ہوئے ڈوبنے سے بچا لیا، جبکہ دو نوجوانوں کو بے ہوشی کی حالت میں اسپتال منتقل کیا گیا۔ریسکیو حکام کے مطابق متاثرہ افراد میں معیز، جازم، حوزن، علی، سعید احمد اور علی مبارک شامل ہیں، جن کی عمریں 19 سے 26 سال کے درمیان ہیں۔حکام کا کہنا ہے کہ معیز اور جازم کو بے ہوشی کی حالت میں سمندر سے نکالا گیا اور تشویشناک حالت کے باعث فوری طور پر اسپتال منتقل کر دیا گیا، جبکہ دیگر نوجوانوں کو موقع پر ہی طبی امداد فراہم کی گئی۔اتوار کی تعطیل اور گرمی کے موسم کے باعث ہاکس بے پر شہریوں کی بڑی تعداد موجود تھی، جس کے پیش نظر ریسکیو حکام نے شہریوں سے سمندر میں نہاتے وقت احتیاط برتنے اور حفاظتی ہدایات پر عمل کرنے کی اپیل کی ہے۔
