شکاگو کے مزدور شہدا کی یاد میں آج پاکستان سمیت دنیا بھر میں مزدوروں کا عالمی دن منایا جا رہا ہے۔ یکم مئی 1886 کو امریکا کے شہر شکاگو میں اپنے حقوق کے لیے جانوں کا نذرانہ پیش کرنے والے مزدوروں کو خراجِ عقیدت پیش کیا جا رہا ہے۔ملک بھر میں سیاسی، سماجی اور مزدور تنظیموں کے زیرِ اہتمام ریلیاں نکالی جا رہی ہیں جبکہ سیمینارز اور جلسوں کا انعقاد بھی کیا جا رہا ہے۔ ان تقریبات میں مقررین شکاگو کے محنت کشوں کی قربانیوں کو یاد کرتے ہوئے مزدوروں کے حقوق کے تحفظ کے عزم کا اعادہ کر رہے ہیں۔واضح رہے کہ یکم مئی 1886 کو شکاگو کے مزدور سرمایہ داروں اور صنعتکاروں کے استحصال کے خلاف سڑکوں پر نکلے تھے، تاہم پولیس کی فائرنگ سے متعدد مزدور جاں بحق اور زخمی ہوئے جبکہ کئی افراد کو اپنے حقوق کے لیے آواز اٹھانے پر پھانسی دی گئی۔
