اسلام آباد
پنجاب یونیورسٹی کے ملازمین کو لے جانے والی بس بالاکوٹ کے قریب حادثے کا شکار ہوگئی، جس کے نتیجے میں 16 افراد زخمی ہوگئے۔ حادثہ ڈرائیور کی جانب سے مخالف سمت سے آنے والی گاڑی کو راستہ دینے کی کوشش کے دوران پیش آیا۔
پنجاب یونیورسٹی کے ترجمان کے مطابق ٹرانسپورٹ ونگ کی بس میں 19 ملازمین سوار تھے جو سفر کے دوران سڑک سے پھسل کر کھائی میں جا گری۔ حادثے کے فوری بعد امدادی کارروائیاں شروع کی گئیں اور زخمی افراد کو مانسہرہ ڈسٹرکٹ ہیڈ کوارٹر (ڈی ایچ کیو) اسپتال منتقل کیا گیا۔
اسپتال میں زخمی ملازمین کو طبی امداد فراہم کی گئی، جبکہ ترجمان کا کہنا ہے کہ خوش قسمتی سے حادثے میں کوئی جانی نقصان نہیں ہوا۔ تمام زخمی افراد کو علاج کے بعد اسپتال سے فارغ کر دیا گیا۔
بس ڈرائیور نے ابتدائی بیان میں بتایا کہ حادثہ اس وقت پیش آیا جب وہ سامنے سے آنے والی گاڑی سے بچنے کی کوشش کر رہا تھا، جس کے دوران بس بے قابو ہو کر سڑک سے اتر گئی اور کھائی میں جا گری۔
حادثے میں زخمی ہونے والے ملازمین میں ندیم سلیمان، سید وقار علی، جنید، محمد عرفان، فرقان، یونس، شکیل احمد، محمد ارشد، محمد ریاض، شوکت، عدنان، حافظ رشید، عبدالجبار، نذیر رشید، تنویر حسین، محمد انور، محمد صدیق، نعمان علی اور دیگر شامل ہیں۔
پنجاب یونیورسٹی ترجمان کے مطابق ملازمین ناران اور کاغان کے ذاتی دورے پر تھے جب حادثہ پیش آیا۔ یونیورسٹی انتظامیہ نے واقعے کا نوٹس لیتے ہوئے زخمی ملازمین کی خیریت معلوم کی اور انہیں ہر ممکن تعاون فراہم کرنے کی یقین دہانی کرائی ہے۔
