نیوز ڈیسک
اسلام آباد: محکمہ موسمیات نے 6 اور 7 اکتوبر کے دوران ملک کے بالائی اور شمالی علاقوں میں تیز ہواؤں، گرج چمک کے ساتھ بارش اور بعض مقامات پر ژالہ باری کی پیش گوئی کی ہے۔
منگل کی صبح اسلام آباد، راولپنڈی سمیت مختلف علاقوں میں بارش ہوئی، جس کے بعد موسم خوشگوار ہوگیا۔ محکمہ موسمیات کے مطابق مغرب سے آنے والا ایک نیا موسمی نظام ملک کے بالائی علاقوں کو متاثر کرے گا، جس کے نتیجے میں کئی علاقوں میں بارش اور ژالہ باری کا امکان ہے۔
محکمے کی جانب سے جاری ایڈوائزری میں خبردار کیا گیا ہے کہ تیز ہواؤں، جھکڑ، گرج چمک اور ژالہ باری کے باعث معمول کی سرگرمیاں متاثر ہوسکتی ہیں، جبکہ کمزور اور غیر محفوظ ڈھانچوں کو نقصان پہنچنے کا خدشہ بھی ہے۔
محکمہ موسمیات نے شہریوں کو کمزور دیواروں اور عمارتوں، کچے مکانات، بجلی کے کھمبوں، بل بورڈز، گاڑیوں اور سولر پینلز کے قریب احتیاط برتنے کی ہدایت کی ہے۔ متعلقہ اداروں اور ریسکیو سروسز کو بھی کسی بھی ہنگامی صورتحال سے نمٹنے کے لیے تیار رہنے کا مشورہ دیا گیا ہے۔
پنجاب کے مختلف علاقوں میں بارش
پنجاب میں اسلام آباد، راولپنڈی، مری، گلیات، اٹک، چکوال، جہلم، منڈی بہاؤالدین، گجرات، گوجرانوالہ، حافظ آباد، وزیرآباد، لاہور، قصور، شیخوپورہ، سیالکوٹ، نارووال، خوشاب، سرگودھا، جھنگ، ٹوبہ ٹیک سنگھ اور فیصل آباد میں تیز ہواؤں اور گرج چمک کے ساتھ بارش متوقع ہے۔
محکمہ موسمیات کے مطابق بعض علاقوں میں ژالہ باری بھی ہوسکتی ہے۔
خیبر پختونخوا میں بھی بارش اور ژالہ باری کا امکان
خیبر پختونخوا کے دیر، چترال، سوات، کوہستان، شانگلہ، بٹگرام، مانسہرہ، ایبٹ آباد، ہری پور، بونیر، مالاکنڈ، باجوڑ، مہمند، کوہاٹ، پشاور، چارسدہ، نوشہرہ، مردان، صوابی، خیبر، کرم، ہنگو، لکی مروت، کرک، بنوں، ڈیرہ اسماعیل خان اور وزیرستان میں گرج چمک کے ساتھ بارش کی پیش گوئی کی گئی ہے۔
کئی مقامات پر ژالہ باری کا بھی امکان ظاہر کیا گیا ہے۔
کشمیر اور گلگت بلتستان میں موسمی سرگرمی متوقع
آزاد کشمیر کے نیلم وادی، مظفرآباد، راولا کوٹ، پونچھ، حویلی، باغ، سدھنوتی، کوٹلی، بھمبر اور میرپور میں تیز ہواؤں اور گرج چمک کے ساتھ بارش متوقع ہے، جبکہ بعض مقامات پر ژالہ باری بھی ہوسکتی ہے۔
گلگت بلتستان کے دیامر، استور، غذر، سکردو، ہنزہ، گلگت، گانچھے اور شگر میں بھی تیز ہواؤں اور گرج چمک کے ساتھ بارش کا امکان ہے، جبکہ کچھ علاقوں میں ژالہ باری ہوسکتی ہے۔
سندھ اور بلوچستان میں موسم گرم اور خشک رہنے کا امکان
محکمہ موسمیات کے مطابق بلوچستان کے بیشتر علاقوں میں موسم گرم اور خشک رہنے کا امکان ہے، تاہم ژوب، بارکھان اور موسیٰ خیل میں تیز ہواؤں کے ساتھ بارش ہوسکتی ہے۔
سندھ کے بیشتر علاقوں میں بھی موسم گرم اور خشک رہنے کی پیش گوئی کی گئی ہے۔
محکمہ موسمیات نے عوام کو موسمی صورتحال کے پیش نظر احتیاطی تدابیر اختیار کرنے اور بالخصوص تیز ہواؤں، گرج چمک اور ژالہ باری کے دوران غیر ضروری سفر سے گریز کرنے کا مشورہ دیا ہے۔
