نیوز ڈیسک
اسلام آباد: غیر ملکی وفود کی آمد و رفت کے پیشِ نظر اسلام آباد پولیس نے سری نگر ہائی وے اور فیصل ایونیو سمیت اہم شاہراہوں پر ٹریفک کی عارضی بندش اور ڈائیورشنز کے حوالے سے ٹریفک ایڈوائزری جاری کر دی ہے۔
پولیس نے شہریوں کو متبادل راستے اختیار کرنے اور سفر کے لیے 20 سے 25 منٹ اضافی وقت مختص کرنے کی ہدایت کی ہے۔
اسلام آباد پولیس کے ترجمان کے مطابق، سری نگر ہائی وے پر ریڈ زون سے کورال تک مختلف مقامات پر اوقات کے مطابق ٹریفک کو متبادل راستوں کی جانب موڑا جائے گا، جس کے باعث اہم شاہراہوں پر ٹریفک کا دباؤ بڑھنے کا امکان ہے۔
پولیس نے سری نگر ہائی وے استعمال کرنے والے شہریوں کو سہروردی روڈ، جی-8 سروس روڈ اور نائنتھ ایونیو اختیار کرنے کا مشورہ دیا ہے۔ زیرو پوائنٹ سے کورال جانے والے افراد بھی نائنتھ ایونیو استعمال کر سکتے ہیں۔
دوسری جانب، کورال سے اسلام آباد آنے والے شہریوں کو اولڈ ایئرپورٹ روڈ، راول روڈ، راولپنڈی-مری روڈ اور آئی جے پی روڈ کے ذریعے فقیر ایپی روڈ استعمال کرنے کی ہدایت کی گئی ہے۔
پولیس کے مطابق، کورال ایکسپریس وے، مری روڈ یا کلب روڈ کی بندش کی صورت میں لیہترار روڈ اور پارک روڈ کو متبادل راستوں کے طور پر استعمال کیا جا سکتا ہے۔
اسلام آباد سے باہر جانے والے شہریوں کو جناح ایونیو اور مارگلہ روڈ اختیار کرنے کا مشورہ دیا گیا ہے، جبکہ بھارہ کہو سے وفاقی دارالحکومت آنے والے افراد بنی گالہ اور پارک روڈ کے راستے سفر کر سکتے ہیں۔
اسلام آباد پولیس نے شہریوں کو خبردار کیا ہے کہ ٹریفک ڈائیورشنز کے دوران اہم شاہراہوں پر رش بڑھ سکتا ہے، اس لیے وہ اپنے سفر کی پیشگی منصوبہ بندی کریں اور منزل تک پہنچنے کے لیے اضافی وقت رکھیں.
پولیس نے شہریوں سے اپیل کی ہے کہ وہ ٹریفک پولیس کی ہدایات پر عمل کریں اور دورانِ سفر تازہ ترین ٹریفک ایڈوائزری سے باخبر رہیں تاکہ کسی بھی ممکنہ دشواری سے بچا جا سکے۔
