تعلیمی اسناد کی تصدیق کا روایتی نظام ختم، یکم جنوری سے نئی ڈیجیٹل سہولت

0

نیوز ڈیسک

اسلام آباد:  انٹر بورڈز کوآرڈینیشن کمیشن (آئی بی سی سی) نے یکم جنوری 2027 سے تعلیمی اسناد کی تصدیق کے لیے مکمل آن لائن ڈیجیٹل سروس متعارف کرانے کا اعلان کیا ہے، جس کے تحت طلباء کو تصدیق کے لیے دفاتر جانے یا دستاویزات کورئیر کے ذریعے بھجوانے کی ضرورت نہیں رہے گی۔

اس فیصلے کی منظوری آئی بی سی سی بورڈ آف ڈائریکٹرز کے اجلاس میں دی گئی، جس کی صدارت ایگزیکٹو ڈائریکٹر ڈاکٹر غلام علی ملاح نے کی۔

نئی سروس کے تحت ملک بھر کے 29 امتحانی بورڈز اور دینی مدارس کی جانب سے جاری کردہ تعلیمی اسناد کی تصدیق آن لائن کی جا سکے گی۔ طلباء اپنے تعلیمی دستاویزات ڈیجیٹل پورٹل پر اپ لوڈ کرکے تصدیق کے لیے درخواست دے سکیں گے۔

آئی بی سی سی کی جانب سے منظوری کے بعد تصدیق شدہ دستاویزات درخواست گزار کے ذاتی آن لائن اکاؤنٹ میں دستیاب ہوں گی، جہاں سے وہ انہیں ڈاؤن لوڈ اور پرنٹ کر سکیں گے۔

نئے نظام کے نفاذ سے دستاویزات کی ترسیل کے لیے کورئیر اخراجات اور دفاتر کے بار بار چکر لگانے کی ضرورت ختم ہو جائے گی، جبکہ طلباء کے وقت اور مالی وسائل کی بھی بچت ہوگی۔

اس سہولت سے بالخصوص ان طلباء کو فائدہ پہنچے گا جنہیں داخلوں، اعلیٰ تعلیم یا دیگر سرکاری و تعلیمی مقاصد کے لیے مختلف اداروں اور وزارت خارجہ میں جمع کرانے کے لیے تصدیق شدہ اسناد کی متعدد نقول درکار ہوتی ہیں۔

نئے نظام کے تحت طلباء پہلے سے تصدیق شدہ دستاویزات کی متعدد نقول پرنٹ کر سکیں گے، جس سے ہر مرتبہ تصدیق کے لیے دوبارہ درخواست دینے اور اضافی فیس ادا کرنے کی ضرورت کم ہو جائے گی۔

آئی بی سی سی کے مطابق ڈیجیٹل نظام میں اسناد کی تصدیق کے مقررہ معیار اور بین الاقوامی مساوات کے تقاضوں کو بھی برقرار رکھا جائے گا۔

کمیشن کی تکنیکی ٹیمیں نئے پورٹل کے بیک اینڈ نظام، سائبر سیکیورٹی اور ملک بھر کے متعلقہ تعلیمی بورڈز کے ساتھ ڈیجیٹل رابطے کو حتمی شکل دے رہی ہیں۔

حکام کے مطابق سروس کے باضابطہ آغاز سے قبل طلباء، والدین اور تعلیمی اداروں کی رہنمائی کے لیے آگاہی مہم اور صارف گائیڈز بھی جاری کی جائیں گی۔

Leave A Reply

Your email address will not be published.