فیصل آباد میں تھانے کی حوالات میں فائرنگ، تین بھائی قتل، ایک زخمی

فیصل آباد:فیصل آباد میں تھانہ صدر تاندلیانوالہ کی حوالات میں بند تین سگے بھائیوں کو قتل کر دیا گیا، جبکہ ان کا کزن شدید زخمی ہوگیا۔

پولیس کے مطابق، علی الصبح نامعلوم مسلح افراد نے تھانے پر حملہ کیا اور حوالات میں اندھا دھند فائرنگ کی۔

جاں بحق ہونے والوں میں بلال، عثمان اور ناصر شامل ہیں، جبکہ زخمی ہونے والے کا نام آصف بتایا گیا ہے۔

مقتولین تھانہ سٹی تاندلیانوالہ میں درج مقدمہ نمبر 1209/24 بجرم 302 ت پ میں ملزم تھے اور دیرینہ دشمنی کی وجہ سے انہیں تھانہ صدر کی حوالات میں رکھا گیا تھا۔

پولیس کے مطابق ملزمان تھانے کے پیچھے سیڑھی لگا کر داخل ہوئے، تھانے کے عملے کے کمروں کو باہر سے بند کر دیا، اور حوالات میں موجود افراد پر گولیاں برسا دیں۔

ترجمان پنجاب پولیس کے مطابق، قتل دیرینہ دشمنی کا نتیجہ ہے، اور جاں بحق ہونے والے افراد پر کھرل برادری کے افراد کے قتل کا الزام تھا۔

واقعے کے بعد پولیس نے چھ مشتبہ افراد کو حراست میں لے لیا ہے، جبکہ مزید تحقیقات جاری ہیں۔

پولیس کا مزید کہنا ہے کہ واقعے کی اطلاع پر سی پی او کامران عادل موقع پر پہنچ گئے۔
سی پی او فیصل آباد سمیت پولیس کی بھاری نفری جائے وقوعہ پر پہنچ گئی، اور علاقے کو گھیرے میں لے لیا گیا۔

سی پی او کے مطابق، ایس ایس پی انویسٹی گیشن کی سربراہی میں ملزمان کی گرفتاری کے لیے ٹیمیں تشکیل دے دی گئی ہیں۔

سی پی او کا کہنا ہے کہ تھانےکی سیکیورٹی میں غفلت کے ذمے داروں کے خلاف کارروائی کا حکم بھی جاری کر دیا ہے۔

مزید پرئیے:https://urdu.thepenpk.com/?p=5835