بھارت میں HMPV وائرس کا پہلا کیس: کیا یہ وبا کے پھیلاؤ کا آغاز ہے؟

بھارت:پڑوسی ملک بھارت میں انسانی میٹا پنیو وائرس (HMPV) کا پہلا کیس رپورٹ ہوا ہے۔
بھارتی میڈیا رپورٹس کے مطابق، بھارتی ریاست بنگلورو سے تعلق رکھنے والے ایک آٹھ ماہ کے بچے میں HMPV وائرس کا ٹیسٹ مثبت آیا ہے، جبکہ کچھ رپورٹس یہ دعویٰ کرتی ہیں کہ دو بچوں میں وائرس کی تصدیق ہوئی ہے۔

بھارتی میڈیا ‘انڈیا ٹوڈے’ کے مطابق، متاثرہ بچوں میں ایک کی عمر آٹھ ماہ اور دوسرے کی عمر تین ماہ ہے۔ دونوں بچوں کی کوئی سفری ہسٹری سامنے نہیں آئی ہے۔

رپورٹ کے مطابق، دونوں شیر خوار بچے برونکوپنیومونیا کی علامات کے ساتھ اسپتال لائے گئے تھے۔

برونکوپنیومونیا، جسے برونکیل نمونیا بھی کہا جاتا ہے، نمونیا کی ایک قسم ہے جس میں پھیپھڑوں میں برونچی اور الیوولی (ہوا کے چھوٹے تھیلے) میں سوزش ہو جاتی ہے۔

برونکوپنیومونیا کی علامات

برونکوپنیومونیا کی علامات ہلکی سے شدید ہو سکتی ہیں، جن میں بخار، کھانسی، سانس لینے میں دشواری، تیز سانس لینا، پسینہ آنا، ٹھنڈ لگنا، سر درد، پٹھوں میں درد، تھکاوٹ، اور بھوک میں کمی شامل ہیں۔

یاد رہے کہ HMPV کا مطلب ہیومن میٹا نیومو وائرس ہے جو کہ چین میں تیزی سے پھیل رہا ہے اور اب بھارت میں بھی اس کا پہلا کیس سامنے آ گیا ہے۔