اسلام آباد:خلیجی ممالک بشمول سعودی عرب میں عید الاضحیٰ کا تہوار بڑے جوش و خروش سے منایا جا رہا ہے۔
سعودی عرب میں نمازِ عید کے سب سے بڑے اجتماعات مسجد الحرام اور مسجد نبویؐ میں ہوئے۔
وزیراعظم شہباز شریف نے رات گئے اپنے وفد کے ہمراہ عمرہ ادا کیا اور پھر مسجد الحرام میں نمازِ عید میں شرکت کی۔
لاکھوں حجاج کرام آج مناسکِ حج کے اگلے مرحلے کے لیے مزدلفہ سے منیٰ پہنچے، جہاں وہ جمرہ عقبہ (بڑے شیطان) کی رمی میں مصروف ہیں۔
حج کے تیسرے اور آخری مرحلے میں کنکریاں مارنے کا سلسلہ جاری ہے، جس کے بعد حجاج قربانی کریں گے اور سر منڈوا کر احرام کھولیں گے۔
طوافِ زیارت اور سعی عام لباس میں کیا جائے گا۔ حجاج کرام 11 اور 12 ذوالحجہ کو بھی منیٰ میں قیام کریں گے اور تینوں شیطانوں کی رمی مکمل کریں گے۔
اس سے قبل حج کا رکنِ اعظم، وقوفِ عرفہ، ادا کرنے کے بعد لاکھوں حجاج نے گزشتہ رات مزدلفہ میں قیام کیا تھا۔
جمعرات کو سولہ لاکھ سے زائد حجاج نے وقوف عرفہ ادا کیا، جہاں فلسطینیوں کے لیے خصوصی دعا کی گئی۔
ابوظبی، شارجہ اور دیگر اماراتی ریاستوں میں بھی نمازِ عید کا انعقاد ہوا۔ عرب میڈیا کے مطابق دبئی کے علاقے القصص میں کلمہ سینٹر کے زیر اہتمام سب سے بڑا اجتماع ہوا۔
نمازِ عید کے اجتماعات میں امن، خوشحالی اور قربانی کی اہمیت پر زور دیا گیا اور اماراتی قیادت کی امن اور مستحقین کی مدد کے جذبے کو سراہا گیا۔
پاکستان کے شہر کراچی میں بھی عید الاضحیٰ مذہبی جوش و جذبے سے منائی گئی، جہاں طاہری مسجد میں بوہرہ برادری کا بڑا اجتماع ہوا۔
نمازِ عید کے دوران ملک و قوم کے لیے خصوصی دعائیں کی گئیں، اور بعد ازاں ایک دوسرے کو عید کی مبارکباد دی گئی۔
نماز کے دیگر اجتماعات صدر، پاکستان چوک، حیدری، بلوچ کالونی سمیت مختلف علاقوں میں بھی ہوئے۔
نمازِ عید کے بعد بوہرہ برادری نے سنت ابراہیمی کی پیروی کرتے ہوئے جانوروں کی قربانی کی۔ اس موقع پر سیکیورٹی کے سخت انتظامات بھی کیے گئے تھے۔
مزید پرئیے:https://urdu.thepenpk.com/?p=6804
