اسلام آباد: راولپنڈی کی زرعی یونیورسٹی کی ایک طالبہ نے اپنے کلاس فیلو پر مبینہ جنسی زیادتی اور بلیک میلنگ کے الزامات عائد کیے ہیں۔ متاثرہ طالبہ کی شکایت پر تھانہ شمس کالونی اسلام آباد پولیس نے مقدمہ درج کر کے تفتیش شروع کر دی ہے۔
پولیس کے مطابق متاثرہ طالبہ نے بیان دیا ہے کہ ملزم نے اسے مبینہ طور پر محبت کا جھانسہ دے کر شمس کالونی اسلام آباد میں واقع اپنے فلیٹ پر بلایا، جہاں اس کے ساتھ جنسی زیادتی کی گئی۔ درخواست میں یہ بھی الزام عائد کیا گیا ہے کہ ملزم نے خفیہ کیمروں کے ذریعے قابل اعتراض ویڈیوز اور تصاویر ریکارڈ کیں۔
متاثرہ طالبہ کے مطابق واقعے کے بعد ملزم نے ان ویڈیوز اور تصاویر کو سوشل میڈیا پر وائرل کرنے کی دھمکیاں دے کر اسے بلیک میل کرنا شروع کر دیا اور جب بھی بلاتا، آنے پر مجبور کرتا رہا۔
پولیس نے بتایا ہے کہ مقدمے میں محمد فیضان ولد زبیر علی کو نامزد کیا گیا ہے۔ پولیس حکام کے مطابق کیس کی مکمل تفتیش جاری ہے، شواہد اکٹھے کیے جا رہے ہیں اور قانون کے مطابق کارروائی عمل میں لائی جائے گی۔
