راولپنڈی آرٹس کونسل میں رمضان المبارک کے موقع پر خطاط زکریا جلیل کی خطاطی کی نمائش

راولپنڈی: پنجاب آرٹس کونسل راولپنڈی کے زیر اہتمام رمضان المبارک کے سلسلے میں معروف خطاط زکریا جلیل کی خطاطی کی نمائش کا انعقاد کیا گیا۔نمائش کا افتتاح رکن قومی اسمبلی طاہرہ اورنگزیب نے بطور مہمانِ خصوصی کیا اور فنکار کے منفرد کام کو سراہا۔ انہوں نے کہا کہ زکریا جلیل نے اپنے فن کے ذریعے اسلامی تعلیمات اور قرآنِ مجید سے اپنی عقیدت کا بہترین اظہار کیا ہے۔نمائش میں بطور اعزازی مہمان محترمہ شازیہ رضوان نے شرکت کی اور فن پاروں کی فکری و روحانی جہت کو قابل تحسین قرار دیا۔زکریا جلیل نے خطاطی کی باقاعدہ تربیت سینئر خطاط محمد عظیم اقبال سے حاصل کی۔ نمائش میں موجود فن پارے کوفی رسم الخط میں تیار کیے گئے ہیں، جو عربی کے قدیم رسم الخط میں سے ایک ہے۔

تقریب میں فنونِ لطیفہ سے تعلق رکھنے والے افراد اور فن کے شائقین کی بڑی تعداد نے شرکت کی۔ آرٹس کونسل کے سینئر افسران بھی اس موقع پر موجود تھے اور انہوں نے فنکار کی تخلیقات کو سراہا۔یہ نمائش رمضان کے روحانی ماحول میں فن و ثقافت کو اجاگر کرنے کا ایک اہم موقع ثابت ہوئی۔