مشرقِ وسطیٰ میں بگڑتی ہوئی صورتحال کے پیشِ نظر ملک بھر کی تیل کمپنیوں نے پیٹرول پمپس کے لیے سپلائی کا کوٹہ مقرر کر دیا ہے۔پیٹرولیم ڈیلرز کے مطابق تمام پمپس کو گزشتہ چھ ماہ کی اوسط فروخت کے حساب سے تیل فراہم کیا جا رہا ہے، جبکہ ذرائع کا کہنا ہے کہ عالمی مارکیٹ میں خام تیل کی قیمتوں میں اضافے کے باعث مقامی سطح پر بھی پیٹرول اور ڈیزل کی قیمتوں میں بڑے اضافے کا خدشہ ہے۔ممکنہ اضافے اور زیادہ منافع کے حصول کے لیے کچھ پیٹرول پمپس بڑے پیمانے پر آرڈرز دے رہے ہیں، حتیٰ کہ وہ پمپس بھی زیادہ ڈیمانڈ کر رہے ہیں جن کی چھ ماہ کی اوسط فروخت کم ہے۔تیل کمپنیوں کا موقف ہے کہ کوٹہ مقرر کرنے کا مقصد تمام پمپس کو بلا تعطل سپلائی فراہم کرنا ہے۔دوسری جانب قیمتوں میں اضافے کی خبروں کے باعث عوام کی جانب سے پیٹرول اور ڈیزل کی خریداری میں بھی اضافہ دیکھا جا رہا ہے۔صورتحال کی سنگینی کو مدِ نظر رکھتے ہوئے پیٹرولیم ڈیلرز نے ہنگامی پریس کانفرنس طلب کر لی ہے، جو آئندہ 24 گھنٹوں میں کراچی میں منعقد ہوگی، اور اس میں اہم اعلانات متوقع ہیں۔
