واشنگٹن (ویب ڈیسک): امریکی صدر ڈونلڈ ٹرمپ نے واضح کیا ہے کہ وہ ایران کے ساتھ کسی بھی قسم کا سمجھوتہ نہیں چاہتے اور ایران کے لیے بہتر ہوگا کہ غیر مشروط طور پر سرینڈر کر دے۔
صدر ٹرمپ نے واشنگٹن میں میڈیا سے گفتگو کرتے ہوئے کہا کہ ایران سیٹلمنٹ چاہتا ہے، لیکن امریکی موقف یہی ہے کہ ایران غیر مشروط سرینڈر کرے۔ انہوں نے کہا کہ میں پہلے ہی کہہ چکا ہوں کہ ایرانی قیادت سرینڈر کرے، ورنہ سرینڈر کے لیے کوئی نہیں بچے گا۔
صدر ٹرمپ نے کہا کہ امریکی افواج نے ایرانی فضائیہ اور بحریہ کو سخت نقصان پہنچایا، میزائل سسٹم تباہ کر دیے، اور ڈرون کی صلاحیت کو بہت کم کر دیا۔ اب ایران کی جانب سے مزید میزائل خطرہ نہیں بن رہے۔
انہوں نے کہا کہ انہیں معلوم نہیں کہ ایران میں جنگ کب تک جاری رہے گی، اور ضرورت پڑنے پر امریکہ زمینی فوج بھیج سکتا ہے، جو ایرانیوں کے لیے تباہ کن ثابت ہوگی۔
صدر ٹرمپ نے کہا کہ اگر روس ایران کو معلومات فراہم کر رہا ہے تو یہ مناسب نہیں، لیکن امید ہے کہ ایسا نہیں ہو رہا۔
ایرانی تیل اور دیگر تنصیبات کے امریکی قبضے کے حوالے سے سوال پر صدر ٹرمپ نے کہا کہ افواہیں معلوم نہیں، اور اگر تصدیق ہو گئی تو مسئلہ ہو سکتا ہے۔ تاہم اگر ایرانی نیوکلیئر سائٹس کی حفاظت ممکن نہ ہوئی تو کارروائی کی جا سکتی ہے۔
صدر ٹرمپ نے ایران پر الزام عائد کیا کہ اسکول پر حملہ ایران کی جانب سے ہوا اور ایرانی ہتھیار صحیح نشانہ نہیں لگا سکے۔
انہوں نے کہا کہ ایران نے مشرق وسطیٰ کے ممالک سے معافی مانگی، جو حیران کن ہے، لیکن یہ معافی اور وہاں سے پیچھے ہٹنا ایران کا سرینڈر اور امریکی و مشرق وسطیٰ کی فتح ہے۔
ڈونلڈ ٹرمپ نے 6 امریکی فوجیوں کی ہلاکت پر افسوس کا اظہار کرتے ہوئے کہا کہ فوجیوں کے تابوت وصول کرنا انتہائی افسوسناک ہے، اور انہیں ہلاک ہونے والے فوجیوں کے اہل خانہ اور بچوں پر فخر ہے۔
