دوحہ (ویب ڈیسک): خلیجی ملک قطر میں ایک ہیلی کاپٹر سمندر میں گر کر تباہ ہو گیا، جس کے بعد عملے اور ممکنہ مسافروں کی تلاش کے لیے ریسکیو آپریشن شروع کر دیا گیا ہے۔
غیر ملکی میڈیا کے مطابق قطری وزارتِ دفاع نے حادثے کی تصدیق کرتے ہوئے بتایا کہ ہیلی کاپٹر فنی خرابی کے باعث سمندری حدود میں گرا۔ واقعے کے فوراً بعد سرچ اینڈ ریسکیو آپریشن شروع کر دیا گیا۔
حکام کے مطابق امدادی کارروائی میں ساحلی سیکیورٹی، بارڈر فورس اور قطری بین الاقوامی سرچ اینڈ ریسکیو ٹیم حصہ لے رہی ہے۔ سمندری حدود میں لاپتا افراد کی تلاش کے لیے جدید آلات اور ہیلی کاپٹر بھی استعمال کیے جا رہے ہیں۔
ابتدائی اطلاعات کے مطابق حادثہ تکنیکی خرابی کا نتیجہ معلوم ہوتا ہے اور فی الحال کسی دشمنانہ کارروائی کے شواہد سامنے نہیں آئے، تاہم حادثے کی نوعیت اور ممکنہ جانی نقصان سے متعلق تفصیلات کا انتظار ہے۔
وزارتِ دفاع کا کہنا ہے کہ واقعے کی مکمل تحقیقات کی جائیں گی جبکہ ریسکیو آپریشن تاحال جاری ہے۔
