ایران-امریکہ-اسرائیل جنگ: اب تک ہلاکتوں اور زخمیوں کی تعداد کتنی ہے؟

اسلام اباد: ایران اور امریکہ و اسرائیل کے درمیان جاری کشیدگی ایک بڑے علاقائی بحران کی شکل اختیار کر گئی ہے، جس میں نہ صرف ایران بلکہ متعدد مشرق وسطیٰ کے ممالک متاثر ہوئے ہیں۔ حالیہ پیش رفت کے مطابق فریقین کے درمیان جنگ بندی کی کوششیں بھی ناکام ہو چکی ہیں، جبکہ خطے میں حملوں اور جوابی کارروائیوں کا سلسلہ جاری ہے۔
ایران اور امریکہ نے دو ہفتے کی جنگ بندی کو قبول کیا تھا جو 8 اپریل کو شروع ہوئی، تاہم اس کے بعد ہونے والے مذاکرات پاکستان کے دارالحکومت اسلام آباد میں 20 گھنٹے جاری رہنے کے باوجود کسی حتمی معاہدے تک نہیں پہنچ سکے۔
امریکی صدر ڈونلڈ ٹرمپ نے اس سے قبل حملے معطل کرنے پر آمادگی ظاہر کی تھی، تاہم شرط رکھی گئی کہ تہران آبنائے ہرمز کو مکمل طور پر دوبارہ کھولے۔
ایرانی وزیر خارجہ عباس عراقچی نے مذاکرات کی ناکامی کا ذمہ دار واشنگٹن کی “زیادہ سے زیادہ مطالبات اور پالیسیوں میں مسلسل تبدیلی” کو قرار دیا، جبکہ امریکی نائب صدر جے ڈی وینس نے مؤقف اختیار کیا کہ ایران کو جوہری ہتھیاروں کے حصول سے روکنے کے لیے واضح یقین دہانی ضروری ہے۔
اس وقت مذاکرات کے دوسرے دور کی تیاریاں جاری ہیں۔ ماہرین کے مطابق دوسرا دور جلد پاکستان میں متوقع ہے، جس میں امریکی صدر ٹرمپ کی ممکنہ شمولیت کا بھی امکان ظاہر کیا جا رہا ہے۔
اب ان مذاکرات کا نتیجہ فریقین کی سنجیدگی اور سیاسی لچک پر منحصر ہوگا۔ تاہم اس بات کا قوی امکان ظاہر کیا جا رہا ہے کہ مذاکرات کا دوسرا دور بھی اسلام آباد میں ہی منعقد ہوگا۔
خطے میں وسیع حملے اور ردعمل
رپورٹس کے مطابق، 28 فروری سے امریکی اور اسرائیلی افواج نے ایران میں جوہری، عسکری اور شہری اہداف کو نشانہ بنایا ہے۔
اس کے جواب میں ایرانی افواج نے مشرق وسطیٰ کے متعدد ممالک میں امریکی و اتحادی تنصیبات پر حملے کیے ہیں۔
اب تک ایران کی جانب سے جن ممالک میں حملے رپورٹ ہوئے ہیں ان میں بحرین، عراق، اردن، کویت، عمان، قطر، سعودی عرب اور متحدہ عرب امارات شامل ہیں۔ اس کے علاوہ ایک ایرانی ڈرون قبرص میں برطانوی فوجی اڈے کے رن وے سے بھی ٹکرا گیا۔
یمن میں حوثی باغیوں نے بھی اسرائیل پر بیلسٹک میزائل حملے کیے، جو اس وسیع تر تنازع کے بعد خطے میں پہلی بڑی پیش رفت قرار دی جا رہی ہے۔
جانی نقصان اور انسانی بحران
اعداد و شمار کے مطابق مختلف ممالک میں مجموعی طور پر ہزاروں افراد ہلاک اور زخمی ہو چکے ہیں۔
ایران:
ہلاکتیں: 2,076
زخمی: 26,500
ہلاک ہونے والوں میں خواتین اور بچوں کی بڑی تعداد شامل ہے۔
اسرائیل:
ہلاکتیں: 26
زخمی: 7,693
امریکی فوج:
ہلاکتیں: 13
زخمی: تقریباً 200
بحرین:
ہلاکتیں: 3
زخمی: درجنوں
عراق:
ہلاکتیں: 118
زخمی: درجنوں
اردن:
زخمی: 29
ہلاکتیں: کوئی رپورٹ نہیں
بڑھتا ہوا خطرہ اور عالمی تشویش
خطے میں جاری کشیدگی کے باعث آبنائے ہرمز کی بندش اور بحری ٹریفک پر ممکنہ پابندیوں نے عالمی توانائی سپلائی کے لیے بھی خطرات پیدا کر دیے ہیں۔ امریکہ نے ایرانی بندرگاہوں پر سمندری آمد و رفت روکنے کے اقدامات کا اعلان کیا ہے، جبکہ اسرائیل لبنان سمیت دیگر محاذوں پر بھی فضائی کارروائیاں جاری رکھے ہوئے ہے۔
ماہرین کے مطابق موجودہ صورتحال نہ صرف مشرق وسطیٰ بلکہ عالمی معیشت اور توانائی کے نظام کے لیے بھی سنگین خطرہ بن سکتی ہے، جبکہ سفارتی کوششیں تاحال کسی واضح نتیجے تک نہیں پہنچ سکیں۔