نیوز ڈیسک
راولپنڈی: غیرملکی وفود کی آمد کے پیش نظر شہر میں سیکیورٹی انتہائی سخت کر دی گئی ہے، جبکہ حکام نے غیرمعمولی اقدامات کے تحت شہر کو تاحکمِ ثانی بند کرنے کا فیصلہ کیا ہے۔
پولیس کے مطابق شہر بھر کے بازار، شاپنگ مالز، ہوٹلز، کاروباری مراکز اور پارکس آج رات 12 بجے سے بند رہیں گے۔ حکام نے واضح کیا ہے کہ احکامات کی خلاف ورزی کرنے والوں کے خلاف سخت قانونی کارروائی کی جائے گی۔
سیکیورٹی ذرائع کا کہنا ہے کہ یہ اقدامات غیرملکی وفود کی آمد و رفت کے باعث کیے گئے ہیں، جس کے پیش نظر شہر میں ہائی الرٹ نافذ کرتے ہوئے خصوصی سیکیورٹی پلان پر عملدرآمد شروع کر دیا گیا ہے۔
تعلیمی اداروں کے حوالے سے بھی اہم فیصلے کیے گئے ہیں۔ پیر مہر علی شاہ ایریڈ ایگریکلچر یونیورسٹی سمیت تمام تعلیمی اداروں کے بوائز اور گرلز ہاسٹلز بند کر دیے گئے ہیں، جبکہ طلبہ کو فوری طور پر گھروں کو واپس جانے کی ہدایت جاری کی گئی ہے۔
اس سے قبل سٹی پولیس آفیسر خالد حمدانی کی زیر صدارت ایک اعلیٰ سطحی اجلاس منعقد ہوا، جس میں سیکیورٹی انتظامات کا تفصیلی جائزہ لیا گیا۔ اجلاس میں بتایا گیا کہ شہر میں امن و امان برقرار رکھنے کے لیے تقریباً 10 ہزار پولیس اہلکار تعینات کیے گئے ہیں۔
پولیس حکام کے مطابق شہر کے داخلی اور خارجی راستوں پر سخت نگرانی کی جا رہی ہے، جبکہ شہریوں سے اپیل کی گئی ہے کہ وہ سیکیورٹی اداروں کے ساتھ مکمل تعاون کریں اور جاری ہدایات پر عمل کریں تاکہ کسی بھی ناخوشگوار واقعے سے بچا جا سکے۔