پیزا ڈلیوری رائیڈر کو لوٹنے والے گینگ کے دو ملزمان گرفتار

نیوز ڈیسک
راولپنڈی:راولپنڈی پولیس نے پیزا ڈلیوری رائیڈر کو لوٹنے والے گینگ کے مبینہ سرغنہ سمیت دو ملزمان کو گرفتار کر لیا۔
پولیس ترجمان کے مطابق ملزمان واردات سے قبل فوڈ آرڈر بک کروا کر ڈلیوری رائیڈر کو مخصوص مقام پر بلاتے تھے، جہاں اسے اسلحے کے زور پر لوٹ لیا جاتا تھا۔
پولیس نے کارروائی کے دوران ملزمان کے قبضے سے چھینا گیا موبائل فون، نقد رقم، فوڈ ڈلیوری بیگ اور واردات میں استعمال ہونے والا اسلحہ برآمد کر لیا۔
ترجمان نے بتایا کہ یہ مقدمہ مئی 2026 میں درج کیا گیا تھا۔ ملزمان کو تکنیکی شواہد اور انٹیلی جنس معلومات کی مدد سے گرفتار کیا گیا۔
ایس پی صدر انعم شیر کے مطابق ملزمان کو ٹھوس شواہد کے ساتھ عدالت میں پیش کیا جائے گا تاکہ انہیں قانون کے مطابق سزا دلوائی جا سکے۔
آٹھ ملزمان گرفتار، 45.5 کلوگرام منشیات برآمد
اینٹی نارکوٹکس فورس (اے این ایف) نے ملک بھر میں انٹیلی جنس کی بنیاد پر سات کارروائیاں کرتے ہوئے ایک خاتون سمیت آٹھ مبینہ منشیات فروشوں کو گرفتار کر لیا، جبکہ 45.5 کلوگرام منشیات برآمد کی گئی، جن کی مالیت ساڑھے 65 لاکھ روپے سے زائد بتائی گئی ہے۔
اے این ایف کے ترجمان کے مطابق کراچی میں دو مختلف کارروائیوں کے دوران کورئیر سروس کے ذریعے بحرین منشیات اسمگل کرنے کی کوشش ناکام بنا دی گئی۔ فیڈرل بی ایریا میں بچوں کے کپڑوں میں چھپائی گئی 4 کلوگرام آئس اور صدر میں مردانہ ملبوسات میں جذب کی گئی 6.3 کلوگرام آئس برآمد کی گئی۔
جھنگ میں بھکر روڈ کے قریب ایک گاڑی سے 5 کلوگرام آئس برآمد کر کے ایک ملزم کو گرفتار کیا گیا۔
ملتان کے شیر شاہ ٹول پلازہ کے قریب ایک گاڑی سے 14.4 کلوگرام چرس برآمد کر کے دو ملزمان کو گرفتار کیا گیا، جبکہ پشاور کے کسٹم چوک کے قریب ایک ملزم سے 5 کلوگرام چرس برآمد ہوئی۔
لاہور میں کینال روڈ پر رکشے میں سوار دو ملزمان سے 4.8 کلوگرام چرس برآمد کی گئی، جبکہ میکلوڈ روڈ پر ایک مسجد کے قریب کارروائی کے دوران ایک خاتون کو گرفتار کر کے اس کے قبضے سے 3.6 کلوگرام چرس اور 2.4 کلوگرام افیون برآمد کی گئی۔
اے این ایف کے مطابق تمام گرفتار ملزمان کے خلاف انسدادِ منشیات ایکٹ 1997 کے تحت مقدمات درج کر لیے گئے ہیں، جبکہ مزید تفتیش جاری ہے۔