میاں چنوں (ویب ڈیسک): میاں چنوں میں کم عمری کی شادی کے کیس میں مقامی عدالت نے اہم کارروائی کرتے ہوئے دولہا سمیت خاندان کے 7 افراد کو جیل بھیج دیا۔
تفصیلات کے مطابق دولہا مبشر کمال، اس کے والد اور بھائیوں سمیت سات افراد کے خلاف متاثرہ لڑکی کی والدہ کی مدعیت میں مقدمہ درج کیا گیا تھا۔
پولیس کے مطابق مقدمے میں اغوا اور کم عمری کی شادی سے متعلق دفعات شامل کی گئی ہیں، جبکہ مزید افراد کے خلاف بھی کارروائی جاری ہے۔
پولیس حکام کا کہنا ہے کہ نکاح کے گواہوں اور دیگر سہولت کاروں کے خلاف بھی سخت قانونی کارروائی شروع کر دی گئی ہے۔
حکام کے مطابق نکاح خواں اور نکاح کے گواہ بننے والے افراد کی گرفتاری کے لیے مختلف مقامات پر چھاپے مارے جا رہے ہیں۔
پولیس کا کہنا ہے کہ قانون کی خلاف ورزی کرنے والے تمام افراد کو انصاف کے کٹہرے میں لایا جائے گا۔
