ٹھکرٹھو (رپورٹ): تھانہ مبارکپور کی حدود میں چوری کی وارداتوں میں اضافہ ہو گیا ہے، گزشتہ رات نامعلوم چور ایک محنت کش کی نئی موٹر سائیکل چوری کر کے فرار ہو گئے۔
تفصیلات کے مطابق مبارکپور شہر میں مرغی فروش وزیر علی مہتم کی 2026 ماڈل سی ڈی موٹر سائیکل گھر کے باہر سے چوری کر لی گئی۔ واقعے کی فوری اطلاع پولیس کو دی گئی، تاہم موٹر سائیکل کا کوئی سراغ نہیں مل سکا۔
شہریوں کا کہنا ہے کہ تھانے میں اہلکاروں کی کمی اور گشت نہ ہونے کے باعث شہر میں چوری کی وارداتیں بڑھ گئی ہیں، جس سے لوگ عدم تحفظ کا شکار ہیں۔
پولیس کے مطابق موٹر سائیکل چوری کی اطلاع تاخیر سے دی گئی اور تاحال مالک کی جانب سے مکمل تفصیلات یا ایف آئی آر درج نہیں کروائی گئی، تاہم پولیس کا کہنا ہے کہ واقعے کی مزید تحقیقات جاری ہیں۔
دوسری جانب متاثرہ شہری وزیر علی مہتم نے ایس ایس پی سکھر سے اپیل کرتے ہوئے کہا ہے کہ وہ ایک غریب محنت کش ہے اور مرغی کا کاروبار کر کے اپنے بچوں کا پیٹ پالتا ہے، اس لیے اس کی چوری شدہ موٹر سائیکل برآمد کر کے واپس دلائی جائے۔
