کاؤنٹر ٹیررازم ڈیپارٹمنٹ کے انٹیلی جنس بیسڈ آپریشن کے دوران 9 دہشت گرد مارے گئے جبکہ 21 افراد کو گرفتار کر لیا گیا، جن میں افغان شہری بھی شامل ہیں۔
سینٹرل پولیس آفس کے مطابق مدرسہ حقانیہ میں دھماکے اور مولانا فضل الرحمان پر خودکش حملے کی منصوبہ بندی سے متعلق کیسز میں اہم پیش رفت ہوئی ہے۔ کرک اور خیبر میں کارروائیوں کے دوران دہشت گردوں کے خلاف بڑی کامیابی حاصل کی گئی۔
سی پی او کے مطابق تحقیقات کے دوران دہشت گردی کی فنانسنگ نیٹ ورک، مالی ذرائع، ٹھکانے اور ٹارگٹ سلیکشن کے طریقہ کار کو بے نقاب کیا گیا ہے، جبکہ کرپٹو کرنسی کے ذریعے دہشت گردوں کی فنڈنگ کے شواہد بھی ملے ہیں۔
پولیس کے مطابق کالعدم تنظیموں کے سلیپر سیلز اور غیر ملکی جنگجوؤں کے نیٹ ورک کا بھی سراغ لگایا گیا ہے۔ تحقیقات میں خوارج کے منظم نیٹ ورک کی نشاندہی ہوئی ہے جبکہ سرحد پار روابط کے باعث تفتیش میں مشکلات کا سامنا بھی ہے۔
سینٹرل پولیس آفس کا کہنا ہے کہ کئی بڑے حملوں، جن میں پولیس لائن خودکش حملہ اور مدرسہ حقانیہ دھماکہ شامل ہیں، کی ذمہ داری کسی تنظیم نے قبول نہیں کی، جبکہ بعض کیسز میں کالعدم تنظیموں کے دعوے غلط اور گمراہ کن ثابت ہوئے ہیں۔
