نیوز ڈیسک
اسلام آباد: وفاقی دارالحکومت میں شدید بارش کے باعث اسلام آباد ٹریفک پولیس نے شہریوں، ڈرائیوروں اور موٹر سائیکل سواروں کے لیے حفاظتی ایڈوائزری جاری کردی، جبکہ مختلف سڑکوں پر پانی جمع ہونے کے باعث ٹریفک کی روانی متاثر ہونے کی اطلاع ہے۔
ٹریفک پولیس نے شہریوں کو ہدایت کی ہے کہ بارش کے دوران گاڑیوں کی رفتار کم رکھیں اور گیلی سڑکوں پر حادثات سے بچنے کے لیے آگے چلنے والی گاڑیوں سے مناسب فاصلہ برقرار رکھیں۔
ڈرائیوروں کو فوگ لائٹس استعمال کرنے، اپنی لین میں رہنے اور لین یا سمت تبدیل کرتے وقت سائیڈ مررز چیک کرنے کے ساتھ اشاروں کا استعمال یقینی بنانے کی ہدایت کی گئی ہے۔ شہریوں سے دورانِ سفر سیٹ بیلٹ لازمی باندھنے کی بھی اپیل کی گئی ہے۔
اسلام آباد ٹریفک پولیس نے موٹر سائیکل سواروں کو ہیلمٹ پہننے اور بارش کے دوران انتہائی بائیں لین میں سفر کرنے کا مشورہ دیا ہے۔
پولیس کے مطابق خراب موسم کے دوران ٹریفک کی روانی برقرار رکھنے، شہریوں کی رہنمائی اور سڑکوں پر ٹریفک کو منظم کرنے کے لیے اہلکار مختلف مقامات پر تعینات کیے گئے ہیں۔
شہری ٹریفک سے متعلق تازہ ترین معلومات اور حفاظتی ہدایات کے لیے اسلام آباد ٹریفک پولیس کے واٹس ایپ چینل، اسلام آباد پولیس کے سوشل میڈیا پلیٹ فارمز اور آئی ٹی پی ایف ایم 92.4 سے رجوع کرسکتے ہیں۔
