نیوز ڈیسک
پاکستان کے معدنی وسائل کو ملکی معاشی ترقی کا مؤثر ذریعہ بنانے اور عالمی سرمایہ کاروں کے لیے ایک پرکشش منزل کے طور پر متعارف کرانے کے عزم کا اظہار کرتے ہوئے آرمی چیف فیلڈ مارشل سید عاصم منیر نے کہا ہے کہ معدنی شعبے میں سرمایہ کاری کے فروغ کے لیے محفوظ، سازگار اور مسابقتی ماحول کی فراہمی قومی ترجیح ہے۔
پاکستان منرلز انویسٹمنٹ فورم سے خطاب کرتے ہوئے آرمی چیف نے واضح کیا کہ پاکستان کو معدنی سرمایہ کاری کے لیے ایک قابل اعتماد اور مسابقتی مرکز بنانا کسی ایک ادارے کی نہیں بلکہ پوری قوم کی مشترکہ ذمہ داری ہے۔
اس مقصد کے لیے کان کنی کے پورے نظام کو محفوظ بنایا جائے گا اور کانوں کے ساتھ وہاں کام کرنے والے کان کنوں کے تحفظ کو بھی یقینی بنایا جائے گا۔
فیلڈ مارشل سید عاصم منیر کے مطابق پاکستان کی معدنی دولت محض قدرتی وسائل کا ذخیرہ نہیں بلکہ ملکی معیشت کو مضبوط بنیادوں پر استوار کرنے اور طویل مدتی خوشحالی کے نئے راستے کھولنے کا ایک اہم ذریعہ ہے۔ اس صلاحیت سے بھرپور استفادہ کرنے کے لیے طویل المدتی شراکت داری اور مؤثر حکمت عملی ناگزیر ہے۔
انہوں نے معدنی شعبے کے مستقبل کا خاکہ پیش کرتے ہوئے کہا کہ پاکستان اب صرف خام معدنیات کی برآمد تک محدود نہیں رہنا چاہتا بلکہ ملک کے اندر ریفائننگ، پروسیسنگ اور مینوفیکچرنگ کی مکمل ویلیو چین قائم کرنے کی سمت آگے بڑھے گا۔
ان کے بقول معاشی خود انحصاری کا راستہ خام مال کی برآمد کے بجائے ویلیو ایڈیشن، صنعتی ترقی اور مقامی پیداواری صلاحیت میں اضافے سے ہو کر گزرتا ہے۔
آرمی چیف نے اس بات پر بھی زور دیا کہ پاکستان کو اپنی صلاحیتوں کے اظہار اور سرمایہ کاری کے وعدوں سے آگے بڑھ کر عملی پیداوار اور ٹھوس نتائج کی جانب سفر کرنا ہوگا۔ معدنی وسائل کی ترقی کے لیے ضروری ہے کہ دستیاب مواقع کو مؤثر منصوبہ بندی اور عملی اقدامات کے ذریعے معاشی فوائد میں تبدیل کیا جائے۔
معدنی منصوبوں کے سماجی اور علاقائی اثرات پر گفتگو کرتے ہوئے انہوں نے کہا کہ قدرتی وسائل سے حاصل ہونے والی ترقی کے ثمرات صرف سرمایہ کاروں یا صنعتی شعبے تک محدود نہیں رہنے چاہئیں بلکہ ان علاقوں کی مقامی آبادیوں کو بھی براہ راست فائدہ پہنچنا چاہیے جہاں یہ وسائل موجود ہیں۔
ان علاقوں میں روزگار کے مواقع، بنیادی سہولیات اور معیارِ زندگی میں بہتری معدنی ترقی کا اہم حصہ ہونا چاہیے۔
فیلڈ مارشل سید عاصم منیر نے پاکستانی عوام کی صلاحیتوں اور قومی عزم کو سراہتے ہوئے کہا کہ پاکستانی قوم محنتی، بہادر اور پُرعزم ہے اور اپنے خوابوں کو حقیقت میں بدلنے کی بھرپور صلاحیت رکھتی ہے۔
انہوں نے اس عزم کا اعادہ کیا کہ ملکی اور غیر ملکی سرمایہ کاروں کو محفوظ اور سازگار ماحول فراہم کرکے معدنی شعبے میں سرمایہ کاری کے نئے امکانات پیدا کیے جائیں گے۔
ان کے مطابق معدنی وسائل کو مؤثر انداز میں بروئے کار لانے، مقامی صنعت کو فروغ دینے اور طویل المدتی شراکت داری قائم کرنے سے پاکستان کی معاشی خود انحصاری اور پائیدار ترقی کی بنیاد مضبوط ہو سکتی ہے۔
