نیوز ڈیسک
عرب پارلیمنٹ نے یمنی حوثی ملیشیا کی جانب سے سعودی عرب پر مسلسل میزائل اور ڈرون حملوں کے تناظر میں تنظیم کے خلاف سیاسی، سفارتی، قانونی اور اقتصادی محاذوں پر جامع حکمت عملی تیار کر لی ہے، جس کا مقصد حوثیوں کو عالمی سطح پر تنہا کرنا اور ان کی عسکری سرگرمیوں کا مؤثر تدارک کرنا ہے۔
عرب پارلیمنٹ کے جاری کردہ بیان کے مطابق اس منصوبے کے تحت حوثیوں کو مالی وسائل اور اسلحے کی فراہمی روکنے کے لیے چار جہتی اقدامات کیے جائیں گے۔
خبر رساں ادارے ’العربیہ‘ کے مطابق حکمت عملی کے پہلے مرحلے میں سفارتی کوششیں تیز کی جائیں گی اور عالمی طاقتوں سمیت اہم دارالحکومتوں سے رابطے کیے جائیں گے تاکہ حوثیوں کی کارروائیوں سے متعلق عالمی برادری کو آگاہ کرنے کے ساتھ اقوام متحدہ کی سلامتی کونسل میں عرب مؤقف کی حمایت حاصل کی جا سکے۔
دوسرے مرحلے میں سیاسی اور سیکیورٹی سطح پر اقدامات کے ذریعے مختلف ممالک اور بین الاقوامی اداروں کو حوثی ملیشیا کو دہشت گرد تنظیم قرار دینے پر آمادہ کیا جائے گا۔
اس سلسلے میں یورپی یونین کی قیادت، بشمول یورپی پارلیمنٹ کی صدر رابرٹا میٹسولہ اور خارجہ پالیسی کی سربراہ کاجا کالاس سے رابطوں اور ملاقاتوں کا منصوبہ بھی شامل ہے۔
ان کوششوں کا مقصد حوثی رہنماؤں اور ان سے وابستہ اداروں کے خلاف سفارتی اور مالی پابندیوں کی راہ ہموار کرنا ہے۔
منصوبے کے تیسرے حصے میں قانونی کارروائیوں پر توجہ مرکوز کی جائے گی۔ اس مقصد کے لیے بین الاقوامی احتسابی اداروں اور عدالتی نظام کے ذریعے حوثیوں پر جنگی جرائم سے متعلق شواہد جمع اور مرتب کیے جائیں گے تاکہ ذمہ دار عناصر کو قانونی کارروائی کا سامنا کرنا پڑے۔
عرب پارلیمنٹ کا مؤقف ہے کہ حوثیوں کی مبینہ مجرمانہ کارروائیاں بین الاقوامی فوجداری عدالت کے دائرہ اختیار میں آتی ہیں، لہٰذا متعلقہ شواہد کو بین الاقوامی قانونی فورمز پر پیش کیا جانا چاہیے۔
حکمت عملی کے چوتھے اور آخری مرحلے میں اقتصادی اقدامات شامل ہیں، جن کے لیے علاقائی اور عالمی سطح پر تعاون حاصل کیا جائے گا تاکہ حوثیوں کے مالی وسائل اور ان کی سرگرمیوں کو معاونت فراہم کرنے والے ذرائع محدود کیے جا سکیں۔
سعودی عرب کے مشیر اور ریاض میں بین الاقوامی قانون کے انسٹی ٹیوٹ کے پروفیسر ڈاکٹر اسامہ العبیدی نے عرب پارلیمنٹ کے اس اقدام کا خیرمقدم کرتے ہوئے اسے درست سمت میں ایک اہم پیش رفت قرار دیا ہے۔
ماہرین کے مطابق حوثیوں کی میزائل اور ڈرون کارروائیاں سعودی عرب کے علاوہ وسیع تر عرب خطے کی سلامتی، علاقائی استحکام اور بین الاقوامی بحری جہاز رانی کے لیے بھی سنگین چیلنج بن رہی ہیں۔
