ای گورننس انڈیکس 2026: پاکستان کی عالمی درجہ بندی میں 17 درجے بہتری

0

نیوز ڈیسک

اسلام آباد: پاکستان نے ڈیجیٹل گورننس کے شعبے میں نمایاں پیش رفت کرتے ہوئے اقوام متحدہ کے ای گورنمنٹ ڈیولپمنٹ انڈیکس (EGDI) 2026 میں 17 درجے بہتری حاصل کرلی ہے، جس کے بعد 194 ممالک کی فہرست میں پاکستان 119ویں نمبر پر آگیا ہے۔

اقوام متحدہ کی ای گورنمنٹ سروے 2026 کی رپورٹ کے مطابق پاکستان نے پہلی مرتبہ درمیانی درجے (Middle EGDI) سے نکل کر اعلیٰ درجے (High EGDI) میں جگہ بنائی ہے، جو ملک میں ڈیجیٹل خدمات کے فروغ کی جانب اہم پیش رفت ہے۔

رپورٹ میں بتایا گیا ہے کہ پاکستان کا ای گورنمنٹ ڈیولپمنٹ انڈیکس اسکور 2024 میں 0.5096 تھا، جو 2026 میں بڑھ کر 0.6264 ہوگیا۔ اس طرح ملک کے مجموعی اسکور میں تقریباً 23 فیصد اضافہ ریکارڈ کیا گیا۔

رپورٹ کے مطابق پاکستان کے ٹیلی کمیونیکیشن انفراسٹرکچر کے اسکور میں بھی 39 فیصد نمایاں بہتری آئی ہے، جس کے بعد یہ 0.6590 تک پہنچ گیا۔ اس پیش رفت کو ملک میں ڈیجیٹل رابطوں اور انٹرنیٹ تک رسائی بہتر بنانے کی کوششوں کا نتیجہ قرار دیا گیا ہے۔

عالمی درجہ بندی میں پاکستان کی یہ مسلسل دوسری بہتری ہے۔ اس سے قبل پاکستان 2022 میں 150ویں جبکہ 2024 میں 136ویں نمبر پر تھا۔

اقوام متحدہ نے پاکستان کو جنوبی ایشیا میں ای گورننس کے شعبے میں نمایاں بہتری حاصل کرنے والے ممالک میں شامل کیا ہے۔ خطے کے دیگر ممالک نے بھی ڈیجیٹل حکومتی خدمات اور انفراسٹرکچر کے فروغ میں پیش رفت کی ہے۔

حکومت نے ڈیجیٹل گورننس کے شعبے میں مزید بہتری کے لیے ڈیجیٹل انفراسٹرکچر میں سرمایہ کاری اور آن لائن سرکاری خدمات کے دائرہ کار کو وسعت دینے کے عزم کا اظہار کیا ہے۔

آئندہ اقدامات میں ڈیجیٹل خدمات تک شہریوں کی رسائی آسان بنانے اور صارفین کے تجربے کو بہتر بنانے پر توجہ دی جائے گی، تاکہ زیادہ سے زیادہ افراد سرکاری امور کی انجام دہی کے لیے آن لائن سہولیات سے استفادہ کرسکیں۔

Leave A Reply

Your email address will not be published.