اسلام آباد پولیس میں 240 افسران کے خلاف محکمانہ کارروائی، 4 ملازمت سے برطرف

0

نیوز ڈیسک

اسلام آباد: وفاقی دارالحکومت کی پولیس میں احتساب اور محکمانہ کارروائی کے تحت 240 افسران کو مختلف سزائیں سنا دی گئیں، جبکہ چار پولیس اہلکاروں کو ملازمت سے برطرف کردیا گیا۔

ترجمان اسلام آباد پولیس کے مطابق ڈی آئی جی اسلام آباد علی وسیم نے اردل روم کا انعقاد کیا، جس میں پولیس افسران کے خلاف عوامی شکایات، مقدمات کی تفتیش اور پیشہ ورانہ کارکردگی کا جائزہ لیا گیا۔

ناقص کارکردگی، نظم و ضبط کی خلاف ورزی، ناقص تفتیش اور فرائض میں غفلت پر مختلف محکمانہ سزاؤں کے احکامات جاری کیے گئے۔ ان میں تین افسران کی تنخواہوں میں کٹوتی، ایک کی تنزلی، 17 کو جرمانے، 47 کی سروس ضبط کرنے اور 6 افسران کی ترقی روکنے کی سزائیں شامل ہیں، جبکہ ایک افسر کا سالانہ انکریمنٹ بھی روک دیا گیا۔

ترجمان کے مطابق 161 پولیس افسران کی سزاؤں کے خلاف اپیلیں منظور کرلی گئیں، جبکہ شوکاز نوٹسز پر تنبیہ جاری کرکے معاملات نمٹا دیے گئے۔

اس موقع پر ڈی آئی جی علی وسیم نے کہا کہ ناقص کارکردگی، فرائض میں غفلت اور بدعنوانی میں ملوث افسران کے لیے محکمہ پولیس میں کوئی جگہ نہیں۔ شہریوں کی جان و مال کا تحفظ پولیس کی اولین ذمہ داری ہے اور اس حوالے سے کسی قسم کی لاپرواہی برداشت نہیں کی جائے گی۔

انہوں نے مزید کہا کہ اچھی کارکردگی کا مظاہرہ کرنے والے افسران کو انعامات اور تعریفی اسناد سے نوازا جائے گا، جبکہ پولیس کی کارکردگی بہتر بنانے کے لیے بلاامتیاز سزا و جزا کا عمل جاری رہے گا۔

Leave A Reply

Your email address will not be published.