ملتان:ملتان میں کھیلے جا نے والے پہلے ٹیسٹ میچ کے دوسرے روز کا کھیل شروع ہو گیا ہے۔
پاکستان نے اپنی پہلی نامکمل اننگز کا آغاز 4 کھلاڑی آؤٹ پر 328 رنز سے کیا، جہاں نسیم شاہ اور سعود شکیل کریز پر موجود ہیں۔
پہلے دن کا کھیل
انگلینڈ کے خلاف پہلے ٹیسٹ میچ کے پہلے دن کھیل کے اختتام تک پاکستان نے 4 وکٹوں پر 328 رنز بنائے۔ کپتان شان مسعود اور عبداللّٰہ شفیق نے شاندار سنچریاں اسکور کیں۔
ملتان کرکٹ اسٹیڈیم میں جاری اس میچ میں پاکستان کی پہلی وکٹ صرف 8 رنز پر گری، جب صائم ایوب 4 رنز بنا کر آؤٹ ہوئے۔
پہلی وکٹ کے جلد گرنے کے بعد شان مسعود اور عبداللّٰہ شفیق نے اننگز کو سنبھالا، اور دونوں کے درمیان 253 رنز کی شراکت قائم ہوئی۔شان مسعود نے 151 اور عبداللّٰہ شفیق نے 102 رنز بنائے، دونوں آؤٹ ہوئے۔
پاکستان کی دوسری وکٹ 261 رنز پر عبداللّٰہ شفیق کی صورت میں گری، جبکہ شان مسعود مزید 2 رنز بعد 151 رنز بنانے کے بعد آؤٹ ہوئے۔
پاکستان کے چوتھے آؤٹ ہونے والے بلے باز بابر اعظم تھے، جنہوں نے 30 رنز بنائے اور پویلین لوٹ گئے۔
پاکستان کا ٹاس جیت کر بیٹنگ کا فیصلہ
ملتان ٹیسٹ کے پہلے میچ میں پاکستان نے انگلینڈ کے خلاف ٹاس جیت کر بیٹنگ کرنے کا فیصلہ کیا۔
ٹاس کے موقع پر گفتگو کرتے ہوئے قومی ٹیم کے کپتان شان مسعود نے بتایا کہ ان کی ٹیم میں 2 اسپنرز اور 3 فاسٹ بولرز شامل ہیں۔
انہوں نے مزید کہا کہ وہ چیزوں کو تبدیل کر کے کھیل میں واپس آنا چاہتے ہیں۔ انگلینڈ کے کپتان اولی پاپ نے کہا کہ اگر وہ ٹاس جیتتے تو بیٹنگ کا فیصلہ کرتے۔
پاکستان کی پلیئنگ الیون
کپتان شان مسعود، سعود شکیل، بابر اعظم، صائم ایوب اور عبداللّٰہ شفیق قومی ٹیم میں شامل ہیں۔
محمد رضوان، سلمان علی آغا اور عامر جمال بھی پلیئنگ الیون کا حصہ ہیں۔ ان کے علاوہ، شاہین آفریدی، نسیم شاہ اور ابرار احمد بھی ٹیم میں شامل ہیں۔
انگلینڈ کی پلیئنگ الیون
اولی پاپ کپتان ہیں، جبکہ زیک کرولی، بین ڈکٹ، جو روٹ اور ہیری بروک بھی انگلینڈ کی ٹیم میں شامل ہیں۔
اس کے علاوہ، جیمی اسمتھ، کرس ووکس، گس ایٹکنسن، جیک لیچ، شعیب بشیر اور برائیڈن کارس بھی انگلش ٹیم کا حصہ ہیں۔
