بیجنگ کا واضح پیغام: پاکستان کی سرحدوں پر کوئی سمجھوتہ نہیں

اسلام آباد:چین نے حالیہ پاک-بھارت فوجی جھڑپ کے تناظر میں ایک بار پھر پاکستان کو اپنا “آہنی دوست” قرار دیتے ہوئے اس عزم کا اعادہ کیا کہ وہ پاکستان کی خودمختاری اور علاقائی سالمیت کے دفاع کے لیے ہر ممکن تعاون فراہم کرے گا۔
بیجنگ کا کہنا ہے کہ چین اور پاکستان کے مابین مضبوط دفاعی شراکت داری نہ صرف جنوبی ایشیا میں طاقت کے توازن کو برقرار رکھے گی بلکہ پورے خطے میں امن و استحکام کی ضامن بھی بنے گی۔
جے-10 سی طیاروں کی مؤثر کارکردگی نے عالمی طاقتوں کو حیرت میں ڈال دیا ہے، جسے چین نے اپنی دفاعی ٹیکنالوجی کی کامیابی اور پاکستان کے ساتھ فوجی اشتراک کی ایک عملی مثال قرار دیا ہے۔ چینی قیادت کی جانب سے واضح پیغام دیا گیا ہے کہ چین سے پنگا نہ لیا جائے۔
سینٹر فار چائنا اینڈ گلوبلائزیشن کے نائب صدر اور معروف چینی ماہرِ خارجہ پالیسی، وکٹر ژیکائی گاؤ نے اس جھڑپ کو چین-پاکستان اسٹریٹجک تعلقات کی پختگی کا عملی مظہر قرار دیا۔

مزید پرئیے:https://urdu.thepenpk.com/?p=6804
ان کے مطابق پاکستانی فضائیہ کی جانب سے استعمال کیا گیا بیشتر جنگی ساز و سامان چین ساختہ یا پاک-چین تعاون سے تیار کیا گیا تھا، جس سے دونوں ممالک کے درمیان عسکری اشتراک کی گہرائی ظاہر ہوتی ہے۔
وکٹر گاؤ نے مزید کہا کہ چینی ساختہ جے-10 سی طیاروں کی کارکردگی نے یورپی اور روسی ساختہ جدید لڑاکا طیاروں کو بھی پیچھے چھوڑ دیا، جو کہ نہ صرف ایک ٹیکنالوجیکل سنگ میل ہے بلکہ عالمی طاقتوں، بالخصوص امریکہ اور یورپی ممالک کے لیے ایک ‘ویک اپ کال’ بھی ہے۔
انہوں نے کہا کہ چین کی فوجی طاقت اب عالمی سطح پر صفِ اول میں آ چکی ہے اور کسی بھی قسم کی مداخلت یا اشتعال انگیزی کے سنگین نتائج ہو سکتے ہیں۔
انہوں نے اس بات پر بھی زور دیا کہ چین اور پاکستان کے تعلقات صرف نظریاتی یا سفارتی نہیں بلکہ ایک فعال اور مضبوط دفاعی اتحاد کی شکل اختیار کر چکے ہیں۔ چین کسی بھی ملک کو پاکستان کی خودمختاری یا سرحدوں کی خلاف ورزی کی اجازت نہیں دے گا۔