اسلام آباد (ویب ڈیسک): پاکستان میں فائیو جی (5G) اسپیکٹرم کی نيلامی باقاعدہ طور پر شروع کر دی گئی ہے۔ ابتدا میں ملک کے پانچ شہروں میں فائیو جی کی فراہم کے لیے نيلامی کی گئی، جس کا پہلا راؤنڈ مکمل ہو چکا ہے اور نتائج جاری کر دیے گئے ہیں۔
پہلے مرحلے میں 2600 میگا ہرٹز بینڈ میں 190 میگا ہرٹز اسپیکٹرم موجود تھا، جبکہ 110 میگا ہرٹز کی اضافی طلب تھی۔ 35 میگا ہرٹز بینڈ میں 280 میگا ہرٹز اسپیکٹرم تھا، جب کہ ڈیمانڈ 200 میگا ہرٹز تک پہنچی۔
دوسرے راؤنڈ میں 2600 بینڈ سے 700 میں سوئچ کیا گیا ہے، جبکہ 7 لاٹس مزید موجود ہیں۔ اضافی ڈیمانڈ کی وجہ سے اسپیکٹرم کی قیمت میں اضافہ کیا جائے گا۔
نيلامی کی افتتاحی تقریب میں چیئرمین پی ٹی اے حفیظ الرحمان نے کہا کہ فائیو جی ڈیجیٹل ہائی وے پاکستان کا انجن ہے۔ وفاقی وزیر آئی ٹی شزہ فاطمہ نے کہا کہ پاکستان فائیو جی ٹیکنالوجی استعمال کرنے والے ممالک میں شامل ہو رہا ہے۔
وفاقی وزیر مالیات محمد اورنگزیب نے کہا کہ نيلامی کے لیے حکومت نے مکمل ایکو سسٹم فراہم کیا ہے، اور ملک بلاک چین اور AI کی نئی انڈسٹری کی طرف بڑھ رہا ہے۔
وزیر مالیات نے مزید کہا کہ فائیو جی اسپیکٹرم نيلامی پاکستان کی ڈیجیٹل معیشت کے لیے اہم قدم ہے، جس سے تیز، سستی اور بہتر ڈیجیٹل سروسز دستیاب ہوں گی۔ نيلامی ورچوئل طور پر آن لائن ہو رہی ہے اور ملک کی تین بڑی موبائل کمپنیاں اس میں شریک ہیں۔
