گوجرانوالہ کے مختلف علاقوں میں پولیس اور جرائم پیشہ افراد کے درمیان تین مبینہ مقابلوں میں 2 ملزمان ہلاک جبکہ 3 کو زخمی حالت میں گرفتار کر لیا گیا۔ پولیس کے مطابق پہلا واقعہ تھانہ لدھیوالہ وڑائچ کی حدود میں پیش آیا جہاں ملزمان نے فرار ہونے کی کوشش کی اور اپنے ہی ساتھیوں کی فائرنگ سے یاسر اور مصطفیٰ ہلاک ہو گئے۔ پولیس کا کہنا ہے کہ یاسر اپنی بیوی اور بیٹی کے قتل کا ماسٹر مائنڈ تھا جبکہ مصطفیٰ اجرتی قاتل تھا۔دوسرا مقابلہ تھانہ سول لائن کے علاقے میں ہوا جہاں ریکارڈ یافتہ ملزم صدیق کو زخمی حالت میں گرفتار کیا گیا جبکہ اس کے 5 ساتھی فرار ہو گئے۔ تیسرا مقابلہ تھانہ کوتوالی میں پیش آیا جہاں خرم شہزاد اور حمزہ کو زخمی حالت میں گرفتار کر لیا گیا۔ پولیس نے ملزمان کے قبضے سے غیر قانونی اسلحہ اور 50 ہزار روپے نقدی برآمد کر کے فرار ملزمان کی تلاش شروع کر دی ہے۔
